Datorren azaroaren 14an, Diabetesaren Munduko Egunaren harira, ‘Mi Dulce Guerrero‘ elkarteak sentsibilizazio- eta elkartasun-jardunaldi zabala antolatu du Irunen, “1 motako diabetesik gabeko mundu bat ez da amets bat, promes bat da” lelopean. Egun osoko egitarauak izaera ludikoa eta aldarrikatzailea uztartuko ditu, hiriko hainbat gunetan adin guztietako herritarrak biltzeko asmoz.
Goizeko programazioa Almudena Grandes plazan garatuko da, 11:00etatik 13:15era bitartean. Bertan, gaztetxoenentzako gune berezi bat prestatuko dute; besteak beste, askotariko jolasak (memory, tiraboteak, hiru marran), photocall-a, Mago Bertoren eskutik globoflexia tailerra, eta txapak, pultserak zein aurpegi-margoketak egiteko guneak egongo dira. Horrez gain, 11:00etatik 12:30era, “Diabetesa beste begi batzuekin margotzen” izeneko pintura-lehiaketa egingo da, María Maldonado margolariaren eta Garabateando Bidasoa elkartearen laguntzarekin. Lehiaketak bi kategoria izango ditu (7 urtera artekoa, eta 8 eta 12 urte bitartekoa); antolatzaileek orri zuriak banatuko dituzte, baina parte-hartzaile bakoitzak bere margo-materiala eraman beharko du. Sari-banaketa 13:00etan izango da, eta jarraian, ‘Globota’ batekin amaituko dute goizeko saioa.
Arratsaldean, jai-giroa hiriko erdialdera, Kale Nagusira eta Legia kalera, lekualdatuko da. Hain zuzen ere, eremu horretan ‘Pintxo Solidarioaren’ hirugarren edizioa ospatuko da, inguruko bederatzi ostalaritza-establezimenduren inplikazioari esker: Ekialde, El Muro, Mari, Manolo, Basque Corner, Bohemian, El Tostadero, Gaztelumendi eta Sargia estatuek hartuko dute parte ekimenean, eta elkartasun-tiketak 1,50 euroan eskuratu ahal izango dira. 18:30etik aurrera, Los Trankilosek girotuko ditu kaleak bere musikarekin, eta 22:30ean emango diote amaiera diabetesa duten pertsona eta familiei eskainitako ospakizunari.
