Kabigorri Bidasoaldeko Ateneoa bere kultur jardunera itzuli da indartsu, pintura eta zuzeneko musika uztartzen dituen proposamen bikoitz batekin. Irungo kultur guneak berriz ekin dio programazioari eta bi hitzordu nagusi prestatu ditu datozen egunetarako: batetik, Julio Martínez Marínen arte-erakusketa azaroaren 21era arte egongo da zabalik bertako egoitzan; bestetik, datorren larunbatean, urriak 24, Slow Times Blues Band laukote zarauztarrak kontzertua eskainiko du 19:30etik aurrera.
Kultur jarduerari berrekiteko musika hitzorduan, Slow Times Blues Band taldeak agertoki gaineko energia bizia eta soinu gordina eramango ditu ateneora. Egitasmoa 2016an jaio zen Zarautzen Iker Urkiri gitarristaren eskutik, eta denborarekin agertokietan ibilbide sendoa osatu duen laukote trinko bihurtu da, Freddie King, Etta James edota Laura Chavez bezalako erreferenteen eraginpean. Estatuko zirkuituko jaialdi esanguratsuetan parte hartu dute —hala nola Arrasate Blues 2025, TolosandBlues 2026 eta Burlada Blues Bar 2026 ekitaldietan—, eta Usurbilgo Aeroson estudioetan grabatutako bi disko plazaratu dituzte (‘Studio Session 2022’ eta ‘Studio Session ’25’). Laukotea Saioa Seseren ahots boteretsuak, Iker Urkiriren gitarra doinu texastar zein txikagotarrek, Carmelo Garcíaren rockabilly eta rock’n’roll ukituko baxuak eta David Gorosperen bateria erritmo sendoak osatzen dute.
Bestalde, azaroaren 21era bitartean Kabigorriko hormetan ikusgai egongo den Julio Martínez Marínen erakusketak arte aske, independente eta etiketarik gabearen aldeko aldarria egiten du. Sortzailearen arabera, pintura eta arteak ez dute baldintzarik edo egiaztagirik behar; norberaren begirada zintzoa plazaratzea eta sentiberatasun zein bizi-ulerkera guztiei lekua egitea da lan hauen funtsa, kanpoko eraginetatik urrun.
