Azken Portu Kiroldegiko erabiltzaileek fitness areto berritu eta zabalagoaz gozatu dezakete dagoeneko. Egindako egokitzapen lanen ondorioz, instalazioak 170 metro karratu irabazi ditu, eta guztira 600 metro karratuko eremua osatu du gimnasioak. Hedapen honekin, indar-ariketetarako eta lan funtzionalerako eskaintza nabarmen handitu da, erabiltzaileen beharrei hobeto erantzuteko asmoz. Berrikuntza hauek ospatzeko, Udalak sustapen berezi bat jarri du martxan hilabete amaierara arte, eta alta berriek doako matrikula izango dute martxotik ekainera bitarteko kuotak ordainduz gero.
Borja Olazabal Kirol ordezkaria kiroldegira hurbildu da gaur goizean berritutako espazioak bertatik bertara ezagutzeko. Ordezkariak azaldu duenez, Udalak bide berriak bilatzen ditu hiriko kirol instalazioak hobetzeko, badakitelako zein garrantzi handia duten herritarren egunerokoan. Olazabalen hitzetan, hobekuntza hauei esker erabiltzaileek ariketak erosotasun eta segurtasun handiagoz egin ahal izango dituzte hemendik aurrera.
Espazioa handitzeaz gain, aldaketa tekniko garrantzitsuak egin dira aretoan. Indar-eremu osoan zoru tekniko berria jarri da, eta ekipamendua nabarmen osatu da tipologia desberdineko hamar makina berrirekin, bederatzi bankurekin eta pisu libreko materialarekin, hala nola barra, disko eta mankuerna berriekin. Gainera, kiroldegiko sarrerako ate zaharrak, astunak zirenak, ate automatikoengatik ordezkatu dira, mugikortasun urriko pertsonen sarbidea errazteko.
Artalekun ere hobekuntzak
Aldi berean, Artaleku Kiroldegian ere hobekuntzak egin dira; harrera-gunea egokitu da argitasun handiagoa emateko, eta igerilekuko aldagelak sabairaino banatzen dituzten panelak altxatu dituzte. Bertan ere ate automatiko bat instalatu da, gurpildun aulkian doazen erabiltzaileak aldageletatik igerilekuraino oztoporik gabe igaro daitezen.
