Pazko Astearekin batera, Irungo adinekoentzako espazioek motorrak piztuko dituzte berriro. Irungo Udaleko Gizarte Ongizateko Arloak, Adinekoentzako Espazioak Dinamizatzeko Zerbitzuaren bitartez, egitarau zabala prestatu du apirilerako. Ekimen honen helburu nagusia hiriko adinekoen artean jarduera fisiko zein intelektualak bultzatzea eta haien arteko harreman sozialak sendotzea da, isolamenduari aurre eginez.
Hilabetean zehar, hamabost proposamen baino gehiago banatuko dira hiriko auzo desberdinetan. Eskaintza apirilaren 7an hasiko da San Migel auzoan, “Osasungintzako lanbide berriak” izeneko ongizate tailerrarekin. Hurrengo egunean, apirilaren 8an, lore tailerra egingo dute Irason, udaberriko giroari ongi etorria emateko. Zinema protagonista izango da San Migelen hilaren 10ean Gaua filmarekin eta 14an, Juncal Alfonsok jarduera artistikoa eskainiko du Luis Marianon.
Apirileko bigarren hamabostaldian, jarduerak areagotu egingo dira. Hilaren 15ean, Anaka-Puianan gozogintza tailerra egingo dute Belaskoeneko kideekin batera, eta Palmera-Monteron kriskitin kontzertu bat izango da. Hurrengo egunean, hilaren 16an, Lekaenean Caramelo taldearen emanaldia izango da, eta Behobian, berriz, kutsu sozialagoa hartuko du egitarauak Open Arms-eko Xabier Urrestiren hitzaldiarekin, Mediterraneoko migratzaileen erreskateari buruz.
Hilabetearen bigarren zatian
Belaunaldien arteko harremanak ere leku berezia izango du apirilean. Hilaren 20an, Belaskoeneko adinekoek eta Lapitzeko haurtxokoko haurrek bingo berezi bat osatuko dute. Ildo beretik, apirilaren 29an Kateako espazioan Belaunaldi arteko Elkartasunaren Nazioarteko Eguna ospatuko dute, Behobiako espazio sozialarekin batera. Horrez gain, kulturak eta gai espezifikoek ere izango dute tokirik: Irasok irakurketa tailer bat egingo du Liburuaren Egunaren harira (hilaren 22an) eta Anaka-Puianan inkontinentziari buruzko tertulia tematiko bat antolatu dute hilaren 21erako.
Hilabetea amaitzeko, musika eta artea izango dira nagusi Palmera-Monteron eta San Migelen. Argoiak Kultur Elkarteak ukelele kontzertua eskainiko du hilaren 24an Palmera Monteron, eta apirilaren 28an Bidasoaldekoak Abesbatza arituko da San Migelen. Azkenik, apirilaren 29an, erakusketa bisitatzeko aukera izango dute Palmera-Monteroko kideek Amaia KZra egingo duten irteera kulturalean, Enrique Albizuren lanak ezagutzeko.
