Datorren maiatzaren 9an, larunbatean, Irungo Urdanibia plazak Sagardo Egunaren 28. edizioa hartuko du. Ekitaldi hau Taupadak GKEak, Betti Gotti Euskara Kultur Elkarteak eta Antxeta Irratiak antolatu dute, elkarlanean beste hainbat eragilerekin, hala nola Irungo Udala, hiriko elkarte gastronomikoak, auzo elkarteak eta San Juan eremuko tabernak. Jokin Melida antolatzaileak azaldu duenez, iaz hasitako bideari jarraipena eman nahi diote, jaia herritarren eta tokiko elkarteen arteko elkarlanaren fruitu baita.
Txotx irekiera arratsaldeko 18:00etan izango da eta 21:00ak arte luzatuko da, edaria lehenago agortzen ez bada. Aurten 10 sagardotegik hartuko dute parte: Irungo Ola; Lesakako Lindduren Borda; Oiartzungo Ordo-Zelai; Errenteriako Egi-Luze; Astigarragako Etxeberria, Gurutzeta eta Petritegi; Hernaniko Altuna eta Larre-Gain; eta Aginagako Urdaira. Guztira 3.600 botila eskainiko dira, eta aurtengo berrikuntza nagusia prezioan dago: 10 euroko tiketa ordainduta, nahi adina sagardo dasta daiteke, edalontzia eta pintxo bat barne. Nuria Alzaga Kultura ordezkariak gogorarazi du, ordea, lauki urdin eta zuriko zapi tradizionala etxetik eraman beharko dutela parte-hartzaileek.
Sagardoaz gain, jatekoak ere garrantzia izango du, elkarte gastronomiko ugarik (Kurpil, Jostailu, Irungo Motor Elkartea, Txingudi Errugbi Kluba, besteak beste) txorizo eta bakailao pintxoak prestatu eta zerbitzatuko baitituzte. Jai giroa borobiltzeko, kultur egitarau zabala antolatu da: Bidasoako Erraldoiak, Auntxa trikitixa taldea eta Kontserbatorioko ikasleak arituko dira plazan, eta eguna amaitzeko Los Trankilos taldeak girotuko du ingurua. Antxeta Irratiak ere bertatik bertara jarraituko du ekitaldia edukia sortzen, eta etorkizunera begira, sagardoa egiteko prozesua plazan bertan erakusteko asmoa agertu dute antolatzaileek.
Azkenik, gogoratu dute Sagardo Egunak helburu solidario nabarmena duela, irabaziak Taupadak GKEaren proiektuetara bideratuko baitira, zehazki Boliviako San Ignacio de Moxosen ur korrontea etxeetara eramateko eta bertako musika eskola kudeatzeko. Nuria Alzagak eskerrak eman dizkie jaia posible egiten duten ehundaka boluntarioei, haien lanari esker Irunek urte osoan zehar kultur eskaintza bizia duelako, eta Udalak horrelako ekimenak babesten jarraitzeko konpromisoa berretsi du.
