Bidasoa-Txingudi Mugaz Gaindiko Partzuergoak —Irun, Hondarribia eta Hendaiako udalek osatuak— «Marraztu Bidasoa 2026» haurren marrazki lehiaketako sariak eman dizkie Adrian Martinez Rodriguezi eta Eider Aramendi Peñari. Ondare historikoari zein naturalari balioa emateko programaren baitan antolatutako deialdi honek eskualdeko aberastasuna haurrengana hurbiltzea du xede adierazpen artistikoaren bitartez.
Lehiaketan Bidasoa-Txingudiko Eskola Festan parte hartu zuten 7 eta 12 urte bitarteko haurrek hartu ahal izan dute parte, eta aurtengo edizioan 25. urteurrena bete duen Bidasoa Folk jaialdiko kontzertuetako giroa irudikatzea izan da erronka nagusia, hala nola Irungo Junkaleko plazatxoan, Hondarribiko Arma Plazan edo Hendaiako Gaztelu Zahar pilotalekuan bizi izandako uneak oinarri hartuta.
Oinarriek bi adin-tarte ezarri zituzten: 7 eta 9 urte artekoa eta 10 eta 12 urte artekoa, eta irabazle bakoitzak arte-materialez osatutako sorta bana jaso du saritzat. Nuria Alzagak, Bidasoa-Txingudi Mugaz Gaindiko Partzuergoko Zuzendaritza Batzordeko presidenteak, azpimarratu du ekimenak hiru hirien arteko loturak sendotzen dituela: «Lehiaketa hau partekatzen dugun lurraldea haurrei hurbiltzeko eta bertako kultura-bizitzan parte hartzeko aukera emateko modu bat da; haien marrazkiek Irun, Hondarribia eta Hendaia lotzen dituzten espazioak eta esperientziak nola ikusten dituzten ezagutzeko aukera ematen digute». Zuzendaritza batzordeko kide diren Estitxu Urtizbereak eta Pascal Destruhautek ere parte-hartzaileen sormena eta mugaren bi aldeen arteko kultur zubiak goraipatu dituzte.
Aurkeztutako lanen erakusketa
Saritutako marrazkiak eta aurkeztutako lanak laster ikusgai jarriko dira Irunen, Bidasoaren Interpretazio Zentroan (Iparralde hiribideko 63. zenbakian, Aduanako eraikin zaharrean), bai eta Partzuergoaren webgune ofizialean ere. Gainera, marrazkiak irudi-banku batean gordeko dira, hiru udalerriek etorkizunean elkarrekin antolatuko dituzten jardueretan eta komunikazioetan erabiltzeko.
