Ekoetxea Txingudik “Zuhaitz-mitologia: Sustraien arteko sinesmenak” izeneko jarduera berezia hartuko du larunbat honetan, maiatzak 23. Hojarasca Kultur Elkartearen eskutik, Plaiaundiko Parke Ekologikoan zehar ibilaldi lasai eta esanahiz betea egingo da natura eta ondare kulturala uztartuz, Biodibertsitatearen Mundu Eguna dela eta. Saioa goizeko 10:30etik 12:30era garatuko da (bi orduko iraupena), gaztelaniaz izango da eta 18 urtetik gorako pertsonei zuzenduta dago. Parte hartzeko sarrera 2,00 euroan eskura daiteke.
Ibilbide honen helburu nagusia Plaiaundiko haritz, haltza, lizar edo makalen azpian ezkutatzen diren antzinako erritualak, sinesmen zaharrak eta kondairak ezagutzea da. Istorioek eta paisaiak bat egingo dute zuhaitzen adarren azpian, naturaren sakontasunari begiratzeko eta gure herri-kultura hobeto ulertzeko modu berri bat eskainiz.
Naturaren esplorazio honetan murgiltzen diren parte-hartzaileek zuhaitz-mitologiak herri-kulturarekin duen lotura estua ezagutuko dute, haritzen zein lizarren erabilera tradizionala eta sinesmen magikoak aztertuz. Horrez gain, belaunaldiz belaunaldiz transmititu diren elezahar eta ipuinen ahozko narrazio zuzenaz gozatzeko aukera izango dute, Mari, Basajaun, lamiak, jentilak eta sorginak bezalako euskal pertsonaia mitologikoek naturarekin duten erlazio sakona gertutik ezagutzeko. Azkenik, ibilbideak inguruko paisaiaren sinbologiak gure eguneroko ingurunearekin duen loturari buruzko hausnarketa sakona egitera gonbidatuko ditu bertaratutakoak.
