2026ko San Pedro eta San Martzial jaien egitarauaren barruan, Uranzu pilotalekuak maila goreneko Esku Pilota Profesionalaren Jaialdia hartuko du berriro ere datorren uztailaren 1ean, arratsaldeko 17:30etik aurrera. Aurten, ekitaldiak interes eta ilusio berezia piztuko du herritarren artean, kartelak Unai Amiano pilotari irundarraren itzulera triunfala jasotzen baitu, B Serieko Buruz Buruko txapela lortu berri duela.
Borja Olazabal Kirol ordezkariak gaur aurkeztu ditu jaialdiaren xehetasunak, Amiano berarekin, Kurpil Kirolakeko Luis Fernandezekin eta Baiko enpresako gerentea den Unai Iglesiasekin batera. Olazabalek azpimarratu du jaialdi hau festetan errotutako ekitaldi historiko eta klasikoa dela, eta aurtengoan pilotari irundarrak bere lurrean profeta izateko aukera paregabea izango duela.
Jaialdiaren egitaraua
Jaialdiko kirol egitarauari dagokionez, lehen partidan promozio mailako bikoteak arituko dira aurrez aurre indarrak neurtzeko, hain zuzen ere, Zubizarreta IV – Eskiroz eta Apezetxea II – Aldabe bikoteak. Arratsaldeko ikuskizun handia eta jaialdiko partida nagusia, ordea, ondoren iritsiko da: Dario edo Ezkurdia eta Martijak osatutako bikotea Unai Amiano eta Mariezkurrena II indartsuaren aurka lehiatuko da. Kantxan sortuko den lehen mailako norgehiagoka honek kirol ikuskizun bikaina eta emozioz betetako arratsaldea ziurtatzen die frontoiko harmailak beteko dituzten zale guztiei.
Unai Amiano pozik agertu da etxeko norgehiagoka jokatzeko aukera izategatik. Txikitan uztailaren 1eko partidua ikustera etortzen zen garaia gogoratu du aurkezpenean esanez “eta orain niri tokatzen zait bertan aritzea”. Profesional bezala egindako lehen denboraldi honekin pozik agertu da, baita txapelketan lortutako emaitzarekin ere, beraz, etxeko lehia honek maila handia izan arren, pozik jokatuko duela azaldu du irundarrak.
Partida hauetaz zuzenean gozatu nahi duten zale guztiek Entradas Frontón webgune ofizialean eskuratu ditzakete sarrerak dagoeneko. Gainera, jaialdiaren egun berean, Uranzu pilotalekuko leihatila ere zabalduko da ordubete lehenago txartelak bertan erosteko aukera eskaintzeko, betiere aldez aurretik online bidez agortu ez badira. Sarrerek bi prezio mota izango dituzte frontoiko kokapenaren arabera: 25 euroko kostua izango dute harmaila altuan, kantxa errebotean eta errebote altuan kokatzen direnentzat; eta 30 euroko prezioa, berriz, kantxan eta harmaila ertainean egongo direnentzat.
Unai etxeko lehian
Unai Amiano pilotari gazteak ibilbide meteorikoa eta arrakastatsua osatu du pilota profesionalean oso denbora gutxian. 21 urteko irundar honek Berako pilota klubean eman zituen bere lehen urratsak, ondoren Añorgan jarraitu zuen eta bere azken urteak Tolosa Aurrera Pilota Elkartean osatu zituen afizionatu gisa. Profesional mailako debut handia 2025eko irailaren 19an egin zuen, bitxia bada ere, Uranzu pilotalekuan bertan izandako jaialdi batean. Ordutik, bere hazkundea esponentziala izan da erabat, eta debutatu eta zortzi hilabete eskasera B Serieko Buruz Buruko txapela janztea lortu du, bere jaioterrian jokatuko duen jaialdi honetarako herritarren babes eta ikusmin osoa bereganatuz.
