Irungo Udalak, Obrak, Mantentzea eta Azpiegituren arloaren bitartez, jakinarazi du herritarren segurtasuna bermatzeko hiriko hainbat zuhaitz ordezkatzeko lanei ekingo diela datozen egunetan. Zuhaitz hauek oso narriatuta daude eta erortzeko arrisku handia dute, hiriko zuhaitzak kudeatzeko eta arrisku-maila ebaluatzeko ezarritako irizpide teknikoen arabera. Erabakia prebentzio neurri gisa hartu da, eta zuhaitz kaltetuak kendu ondoren, ale berriak landatuko direla ziurtatu du Udalak hiria berde eta seguru mantentzeko.
Hasitako lanak
Astearte honetan bertan, ekainak 16, bi albo moztu dituzte Junkal plazatxoan. Teknikariek egiaztatu dutenez, bi zuhaitzak oso egoera kaskarrean eta narriatuta zeuden, eta zama gehigarria izanez gero (haizea edo euria, esaterako) erortzeko arrisku larria aurkezten zuten herritarrak ibiltzen diren gune horretan.
Era berean, Artiako auzoan ere zuhaitzak kudeatzeko mantentze lanekin jarraitu dute gaurko egunez. Eremu horretan, nahi gabe hazitako 5 zuhaitz moztu dituzte; zuhaitz hauek oker zeuden jada eta haizea egin duen azken aldietan horietako batzuk erorita zeuden, inguruko bideetan arriskua sortuz.
Martindozenea parkeko makalak, datorren astean
Udalak programatutako planen arabera, lanek datorren astean izango dute jarraipena Martindozeneako parkean. Bertan, 4 makal moztuko dituzte datozen egunetan. Zuhaitz horien egoera aldizka ikuskatu eta aztertu dute udal-zerbitzuekin; baina, duela gutxi egindako azken ebaluazioen arabera, oso arrisku handiko mailara igaro dira egiturazko arazoengatik. Hori dela eta, ezbeharrak saihesteko lehenbailehen kentzea adostu da, ondoren ingurua leheneratu eta ale berriak aldatzeko.
