Irungo Udalak, Bidasoa Bizirik eta Oiasso Museoaren eskutik, hiriko historia zein ingurune naturala ezagutzeko bisita gidatuen eskaintza zabala jarri du martxan uda honetarako. Kultur proposamen hauen bidez, herritarrek eta bisitariek Irungo ondare ikonikoenetako bi ezagutzeko aukera izango dute datozen egunetan: Juncaleko Andre Maria parrokiaren kanpandorrea eta Irugurutzetako meatze-eremu historikoa.
Alde batetik, Juncal elizako kanpandorrerako bisita gidatuak uztail zein abuztuko larunbatero egingo dira. 25 minutuko ibilbide elebidun hauetan, parte-hartzaileek elizaren historia ezagutuko dute eta goialdetik hiriaren ikuspegi panoramiko zoragarriez gozatu ahal izango dute. Bisitak goizez egingo dira, hiru txandatan (11:00etan, 11:45ean eta 12:30ean), pertsonako 1,50 euroko prezioan. Hain zuzen ere, bihar, larunbatean, 11:00etan bisita egiteko aukera izango da. Parte hartzeko ezinbestekoa da aldez aurretik izena ematea Luis Marianoko Turismo Bulegoan, turismoirun@bidasoa-activa.com posta elektronikora idatzita edo 943 020 732 telefonora deituta.
Bestetik, Oiasso Museoak Irugurutzetako meategi-eremua ezagutzeko bisita komentatuak proposatzen ditu ostiral eta igandetan. Hain zuzen ere, igande honetan, abuztuaren 16an 11:00etan bisita gidatua egingo da. Parte-hartzaileak Museoan bertan igoko dira ‘Tren Txikito‘-ra eta Aiako Harriaren magalean dagoen natura-parajera eramango dituzte. Bertan, XX. mendeko burdin-ustiapenaren historia, meatzaritzako labeak eta garraio-sistemak aztertuko dira. Saioak ostiraletan (16:00etan gaztelaniaz eta 17:30ean euskaraz) eta igandetan (11:00etan gaztelaniaz eta 12:30ean euskaraz) izango dira. Sarrerak 12 eurokoak dira (tarifa orokorra) edo 9 eurokoak (tarifa bonifikatua), eta erreserba gutxienez 24 ordu lehenago egin behar da 943 63 93 53 telefonora deituta edo museoaren webgune ofizialean.
