Txingudi Errugbi Taldea martxa berriz hasteko lanean ari da udako oporrei itxiera ona eman eta denboraldi berria indarrez abiatzeko helburuarekin. Proposatutako ekimenen bidez, klubak errugbia Bidasoaldeko eskualdera hurbildu nahi du, aire zabaleko ariketa fisikoa ez ezik, diziplina honi lotutako oinarrizko balioak ere sustatuz: elkarlana, errespetua, adorea, apaltasuna eta talde-lana, hori guztia ingurune euskaldun eta naturalean.
Oporren azken egunetan familiei kontziliazioan laguntzeko asmoz, elkarteak uda amaierako ludoteka berezia jarri du martxan abuztuaren 31tik irailaren 4era bitartean. Jarduera aisialdian zein bizikidetzan oinarritzen da, eta eguneko prezioa 5 eurokoa da, deskontuak eskuragarri izanda. Horrez gain, emakumeen kirola bultzatzeko konpromisoari jarraituz, Emakume Errugbi Egunaren edizio berria egingo da irailaren 26an, emakumeen errugbiari ikusgarritasuna eman, jokalari berriak erakarri eta topagune inklusiboa eskaintzeko asmoz.
Lanera buelta
Taldeak pixkanaka lanera bueltatzen ari dira. Seniorrek abuztuan ekin zioten denboraldiaurreari, akademiakoak (Sub 16 eta Sub 18) abuztuaren azken astean hasiko dira, eta 8 eta 14 urte bitarteko haurrek Hondarribiko jaien ondoren hartuko dute lekukoa. Irailean eta urrian zehar, Plaiaundik ateak zabalduko dizkie 2018 baino lehen jaiotakoei. Ordutegiei dagokienez, S10 (2017-2018) eta S12 (2015-2016) kategoriako kideak ostiraletan elkartuko dira 18:30etik 20:00etara. S14 (2013-2014), S16 (2011-2012) eta S18 (2009-2010) taldeek astearte nahiz ostegunetan egingo dituzte saioak, S14en kasuan 17:30etik 19:00etara eta S16 nahiz S18en kasuan 18:00etatik 19:30era. Gizonezko seniorrek astearte eta ostegunetan entrenatuko dute 19:30etik 21:00etara (2008 baino lehen jaiotakoak), eta Emakumezko seniorrek astelehen, asteazken zein ostiraletan ordu berean (2011 baino lehen jaiotakoak).
Lehiaketa ofizialez haratago, errugbia modu askeagoan gozatzeko hainbat talde ere antolatu dira ikasturtean zehar. Helduei zuzenduta Tokata saioak egingo dira astelehen zein asteazkenetan 19:00etatik aurrera (entrenamendu funtzionala eta plakajerik gabeko errugbia) eta Bootcamp saioak igandero 10:30ean. Klubeko gurasoek beren taldea izango dute ostiraletan 18:30etik aurrera, eta 2009 eta 2014 artean jaiotako gazteentzat Rugby 5 eskainiko da. Azkenik, San Marcial Eskaut-Gia taldearekin elkarlanean, 2019 eta 2020an jaiotako haurrek psikomotrizitatea zein balioak landuko dituzte ostiralero 18:30etik 20:00etara. Ekintza hauetan guztietan izena emateko edo informazio gehiago jasotzeko, interesdunak info@txingudirugbyclub.eus helbidera idatz daiteke, 688 745 362 telefonora deitu edo www.txingudirugbyclub.eus webgunea bisitatu.
