Jakobi Irun-Bidasoko Donejakue Bidearen Lagunen Elkarteak, Irungo Argazki Elkartearekin (AFI-IAE) lankidetzan, “Donejakue Bideak” Argazki Lehiaketaren IX. edizioa antolatu du urriko Aste Jakobeoaren egitarauaren barruan. Lehiaketan edozein pertsonak hartu ahal izango du parte, koloretan zein zuri-beltzean egindako gehienez hiru argazkirekin, betiere gaiak Donejakue Bidearekin lotura zuzena badu eta beste lehiaketaren batean saritua izan ez bada. Lanak aurkezteko azken eguna 2026ko irailaren 30a izango da.
Argazkiak modu digitalean nahiz fisikoan aurkez daitezke. Bide digitala hautatuz gero, fitxategiak irunsantiago@yahoo.es helbidera bidal daitezke e-mailez edo CD/pen-drive bidez helarazi, egilearen datuekin (izena, helbidea, telefonoa, e-posta) eta argazkien titulu zein kokapenekin batera. Bidalketa fisikoa eginez gero, berriz, lanak 40×50 zentimetroko kartulinetan muntatuta eta CD batekin batera utzi beharko dira Jakobi elkartearen egoitzan (Lesaka kalea 1, Irun).
Epaimahaiak guztira bost sari emango ditu: lehenengo sariak 300 euro eta diploma jasoko ditu, bigarrenak 200 euro eta hirugarrenak 100 euro. Horiez gain, bertako egile onenaren saria (100 euro) eta “Irungo Aterpetxea” gaiari bideratutako sari berezia (100 euro) ere banatuko dira. Epaimahaiaren erabakia urrian egingo den sari-banaketa ekitaldian jakinaraziko da, eta egun berean saritutako zein hautatutako argazki guztiekin osatutako erakusketa inauguratuko da Irunen.
