Irungo Udalak, Kontsumitzailearen Informaziorako Udal Bulegoaren (KIUB) bidez eta Kontsumobiderekin zein ACUBI Bidasoako Kontsumitzaile eta Erabiltzaileen Elkartearekin elkarlanean, sentsibilizazio-programa bat jarri du martxan urtea amaitu bitartean. Egitarau honen helburu nagusia herritarrak zein tokiko merkatariak kontsumo arduratsu, seguru eta jasangarriaren inguruan prestatzea da. Sandra Caballero Kontsumoko ordezkariak gaurko aurkezpenean azpimarratu duenez, funtsezkoa da udal-administraziotik herritarrei beren eskubide eta betebeharren berri ematea, hirian erosketa-ohitura seguruak zein kontzienteak sendotzeko asmoz.
Egitaraua hiru topaketa nagusitan banatuko da urrian, azaroan eta abenduan. Lehenengo saioa urriaren 21ean egingo da Belaskoeneako Adineko Pertsonen Espazioan (Ferrones kalea, 32), 17:30etik 19:00etara. “Erosketak egitera goaz” izenburupean, Kontsumobidek adinekoei zuzendutako aholku praktikoak eskainiko ditu erosketak modu babestuan egiteko. Bigarren saioa azaroaren 19an izango da Commerce Lab-en (Serapio Múgica kalea, 8), 13:30etik 14:30era; ACUBIk gidatutako “Bezeroekiko harremanean eskubide eta betebeharrak” tailer honetan, dendariei informazio teknikoa emango zaie bezeroekiko kontsumo-gaiak hobeto kudeatzeko.
Zikloari amaiera emateko, abenduaren 2an sareko erosketak izango dira hizpide Palmera Montero Gunean (Leandro Agirretxe plazatxoa), 18:00etatik 19:30era. “Interneten bidez segurtasunez erosteko, klik egin aurretik kontuan hartu behar dena” hitzaldian, online erosketetan egon daitezkeen arriskuak eta prebentzio-neurriak aztertuko dira.
Izen ematea
Herritar guztiei zuzendutako bi hitzaldi nagusietarako sarrera librea izango da lekuak bete arte; dendarientzako tailerrak, berriz, Bidashop merkatarien elkartearen eskaerari erantzuten dio eta bertako kideei bideratuta dago.
