IRUDEK Bidasoa Irunek Europako Ligako partida jokatuko du gaur Limogesen aurka Frantzian. Aurkariak kalitate handiko multzoa du eta Frantziako ligako lehen lau postuen artean dago kokatuta une honetan. Gainera, bidasotarrentzat oso ezagunak diren jokalariak ditu bertan, hala nola Jon Azkue eta Piotr Mielczarski. Neurketa gaur jokatuko da, 20:45etik aurrera, Limogeseko Palais des Sports de Beaublanc kiroldegian.
Álex Mozas entrenatzaileak adierazi duenez, taldeak maila bikaina eman beharko du zerbait positiboa lortzeko: “Frantziako ligako ‘top 4’ talde baten aurrean gaude, kalitate handikoa. Aurrekoan oso erraz irabazi zieten islandiarrei, eta larunbatekoa baino partida hobea egin beharko dugu bertatik zerbait ekartzeko”.
Entrenatzaile bidasotarrak bi taldeen arteko azken norgehiagokatik hona frantziarrek izan dituzten aldaketak aztertu ditu, Kieffer atezainaren etorrerak emandako kalitate-jauzia eta jokalari gazteen ekarpena aipatuta. Mozasen hitzetan, gakoetako bat etxeko jokalari nagusiak ondo lotzea izango da, bereziki Pelayo eskuin albokoan eta Mielczarski ezkerrekoan, denboraldi hasiera bikaina egiten ari baitira.
Bestalde, Julen Mujika jokalariak ere gaurko hitzorduaren garrantzia eta zailtasuna nabarmendu ditu, baina taldeak Europan erakutsi ohi duen lehiakortasuna gogorarazi du: “Badakigu partida oso garrantzitsua dela, aurkari handiaren eta plantilla oso onaren kontra. Europan zerbait aitortu ahal badugu, mota honetako aurkariei gauzak zail jartzen dizkiegula da; asmo horrekin joango gara, ea zerbait lortzen dugun”.
