Irungo Udaleko Obra, Mantentze Lan eta Azpiegitura arloak jakinarazi duenez, Artia auzoko hiri-igogailuaren funtzionamendu-ordutegia luzatu da. Aurrerantzean, Dario de Regoyos eta Pio Baroja kaleak lotzen dituen azpiegiturak ordubete gehiagoz emango du zerbitzua gauean, itzaltzeko ordua 23:00etatik gauerdiko 00:00etara atzeratuta. Ordutegi berri honekin, igogailua egunero goizeko 06:00etatik 00:00etara egongo da erabilgarri etenik gabe.
Udalak azaldu duenez, ordutegi-luzapen honek auzoko bizilagunen eskaera zuzen bati erantzuten dio, inguruko irisgarritasuna bermatu eta gaueko joan-etorriak errazteko asmoz.
Gainontzekoen ordutegietan aldaketarik ez
Bestalde, Udalak zehaztu du hirian dauden gainerako hiri-igogailu publikoek orain arteko ordutegi bera mantenduko dutela. Hala, Artaleku kiroldegikoa, Colon pasealekuko Topoko geralekukoa eta Gaztainondo nahiz Iñigo de Loiola kaleen artekoa goizeko 06:00etatik gaueko 23:00ak arte egongo dira martxan, ohiko moduan.
