Irungo Udaleko Gazteria Zerbitzuaren GazteARTEan programak 2026/2027 ikasturteko haurrentzako lehenengo sorkuntza-tailerrak jarri ditu martxan. Lau urtetik zortzi urtera bitarteko umeei zuzendutako ekimen honek parte-hartzaileei ondo pasatzeko eta hainbat diziplina artistiko, zientifiko zein espresiboren bidez esperimentatzeko espazioa eskaintzea du helburu. Ikasturteko lehenengo zikloak “Esperimentatu eta ikasi” du izena, eta gai zientifikoak nahiz esperimentu praktikoak jorratuko ditu, txikienen artean jakin-mina eta deskubrimendurako grina pizteko asmoz.
Lehen bloke hau urriko eta azaroko lau larunbatetan zehar gauzatuko da, goizeko 10:00etatik 13:00etara bitartean, Gipuzkoa hiribideko 8. zenbakian dagoen Hirigune haurtxokoan. Izena emateko epea urriaren 21era arte egongo da zabalik, edo plazak agortu arte, eta interesdunek udal webgunean egin ahal izango dute eskaera, doan. Udalak gogorarazi du izen-ematea lau tailerrek osatzen duten bloke osoarentzat egin behar dela.
Gainontzeko haurtxokoetara zabaltzea
Tailer zientifiko horien ondoren, sorkuntza-zikloak hiriko haurtxokoetara zabaltzen jarraituko du ikasturtean zehar: urtarrilean eta otsailean “Hitzen eta irudimenaren mundua” landuko dute Txikilab haurtxokoan; otsailean eta martxoan “Zarata eta mugimenduak” Lapitzeko egoitzan; apirilean eta maiatzean “Ingurumeneko altxorrak” San Migelen; eta, ikasturtea ixteko, maiatzean eta ekainean “Jolasak eta kirola” egingo dituzte berriro ere Hirigune haurtxokoan.
