Irun Zuzenean Zikloak aurrera darrai udazkeneko kultur programazioarekin, eta larunbat honetan, urriak 24, rock alternatiboa eta indie doinuak eramango ditu CBA Kultura eta Sorkuntza Zentrora. Gaueko 21:00etatik aurrera, La Paloma eta La Habitación Roja igoko dira oholtza gainera, belaunaldi desberdinetako soinuak eta gitarrak uztartuko dituen hitzordu bikoitzean. Irun Rock jaialditik eratorritako ekimen honek musika estilo, artista eta espazio desberdinak gurutzatzen jarraitzen du hirian, ibilbide luzeko taldeak eta eszena berriko proposamenak elkartuz.
Proposamen gazteenen aldetik, La Paloma estatuko rock alternatibo berriaren izen azpimarragarrienetako bat bihurtu da, 90eko hamarkadako gitarren indarra eta gaur egungo sentsibilitate garaikidea maisuki lotuz. Bestalde, hiru hamarkada baino gehiagoko ibilbide sendoarekin, La Habitación Roja indie rockaren erreferente ukaezina da; valentziarren abesti melodikoek eta letra sakonek maitasuna, oroimena, denboraren igarotzea eta eguneroko zoriontasunaren bilaketa jorratzen dituzte. Gainera, areto nagusiko zuzenekoez gain, musikak CBAko IrekiART eremua ere hartuko du: Optigan 1 arduratuko da giroa jartzeaz kontzertuen aurretik eta ostean, eszena alternatiboko azken nobedadeak zein pop eta rock klasikoak uztartuz.
Sarrerak eskuragarri
Larunbateko kontzertuetarako sarrerak gaur bertan jarriko dira eskuragarri, 15:00etatik aurrera, Irungo Udalaren webgunearen bidez. Sarrera orokorraren prezioa 16 eurokoa da, eta 11 eurokoa tarifa hobariduna. Horrekin batera, zikloko emanaldi guztietarako bonuak erosteko aukera dago: 40 euroan orokorra eta 30 euroan hobariduna (langabeentzat, 14 urtetik beherakoentzat, gazte-txartela dutenentzat eta familia ugarientzat). Zikloari amaiera emateko, urriaren 31n Garazi Esnaola eta Amaia Miranda arituko dira areto berean (10 euro / 7 euro hobariduna).
