Behar Bidasoak tristura handiz jakinarazi zuen ostiralean Agustin Ugarte Manterola heriotza. Agurrean GKEak gogoratu du Agustin Ugarte hiriko eta Gipuzkoako elkartasunaren erreferentea izan dela bere bizitza osoan zehar, erakundearen sortzaile eta presidentea izateaz gainera.
Erakundetik nabarmendu dutenez, Agustinek bere bizitza osoa eskaini zion besteei laguntzeari eta komunitateen arteko lankidetza loturak eraikitzeari: “Bere konpromiso sozialak, pertsona desberdinak helburu komun baten inguruan elkartzeko gaitasunak eta gizatasun sakonak Behar Bidasoaren ibilbidea markatu zuten hasiera-hasieratik”.
Erakundearen sortzaile eta presidente gisa, Agustin beti izan zen bultzada-indarra eta konfiantza iturri bazkideentzat, boluntarioentzat eta kolaboratzaileentzat. Hainbat aldiz bidaiatu zuen Kabugara (Ruanda), proiektuen bilakaera bertatik bertara ezagutzeko, familiei entzuteko eta lankidetza-lanaren eragina zuzen-zuzen ikusteko. Hurbiltasunak eta pertsonen duintasunarekiko errespetu sendoak Behar Bidasoa gaur egun dena izatera eraman zuten.
Bere ibilbideak hainbat aitortza publiko jaso zituen, besteak beste Irungo Hiriaren Urrezko Domina, eta baita Gipuzkoako Foru Aldundiak bere izena daraman saria sortzea ere, nazioarteko lankidetzan egindako bizitza osoko lanari omenaldia eginez.
Konpromiso etengabea amaierara arte
93 urte zituela ere, Agustin aktibo jarraitu zuen azken egunera arte, Behar Bidasoaren jarduerak partekatuz, boluntariotza animatuz eta Kabugatik zein beste garapen-guneetatik iristen ziren aurrerapenak ospatuz. Bere konpromisoa etengabea eta benetan inspiratzailea izan zen.
Datorren urtean 50 urte beteko dira Kabuga eta Irunen arteko harremana hasi zenetik, eta mugimendu haren lehen urratsetan parte hartu zutenen artean izan zen Agustin, Jose Ramon Amunarrizekin batera. Lotura historiko horrek bere arrastoa eta bere ikuspegi bidezkoa eta solidarioa daramatza.
Irungo Urrezko Domina jasotzeko ekitaldian, gaur egun inoiz baino indar handiagoa duten hitzak utzi zituen. Orduan herritarrei honakoa eskatu zien: “Mundu bidezkoago baten alde borrokatu eta sinesteko, diferentziak errespetatuz, jarrera egoistak alde batera utziz eta gure bizitzan txoko bat eginez beharrik handiena dutenei, gizaki gisa dagokien justiziazkoa emateko”.
Behar Bidasoatik dolumin zintzoenak helarazi dizkiete bere familiari, lagunei eta bera ezagutu zuten guztiei. “Bere ondarea gure proiektu bakoitzean eta aldatzen jarraituko duten bizitza guztietan bizirik egongo da, berak hasi zuen bideari esker”, azpimarratu dute GKEtik.
