IRUDEK Bidasoa Irunek gaur jokatuko du European Leagueko denboraldi honetako azken partida. Aurkaria ez da nornahi izango: Montpellier taldea. Europako txapelketari agur esateko ordua iritsi bada ere, talde irundarrak helburu argia du: lehiatzea eta txapelketako lehen bi puntuak poltsikoratzea, sentsazio onenekin agurtzeko.
Taldea sasoi onean eta konfiantzaz gainezka iristen da hitzordu honetara, joan den ostiralean Huescan lortutako garaipen garrantzitsuaren ondoren. Álex Mozas entrenatzaileak partida hark izan zuen garrantzia azpimarratu du: “Huescako partida guretzat final bat izan zen, berriro Liga Asobalen irabazi behar genuelako; Montpellierren aurkako partida honetara animoak indartuta iristen gara”.
Entrenatzaile madrildarrak argi utzi du taldeak ez duela aukera hau pasatzen utzi nahi: “Ez litzaiguke gustatuko zero punturekin amaitzea; beraz, bi puntu horien alde borrokatu behar dugu klubaren irudiagatik, eta hortik aurrera, Barçan pentsatzen hasi.”
Gazteei bidea irekiz
Gaurko neurketak osagai berezi bat izango du: harrobiko jokalarien presentzia. Kielen erakutsitako maila onaren ostean, Mozasek berretsi du gazteek protagonismo handia izango dutela Artalekun: “Minutu asko emango dizkiegu, jendeak hemen ikus ditzan; hori beti gustatzen zaio jendeari”.
Ildo beretik hitz egin du Iñaki Caverok ere. Jokalari irundarrak taldearen izaera borrokalaria nabarmendu du, aurkariaren maila gorabehera: “Gure helburu nagusia partida guztiak lehiatzea da. Zikloa amaitzeko modu ona da: gaur Montpellier eta asteburuan Barça; bi partida oso gogor, baina gure helburua errespetatuz”.
Caverok dei egin die zaleei azken neurketa honetaz gozatzeko eta taldeak dena emango duela agindu du: “Gaudenok eta gazteek dena emango dugu partida handi bat egiteko, eta Irungo jendea gozatzen saiatuko gara”.
Unai Barretok
Bidasoa kirol klubak Unai Barreto jokalariaren osasun egoeraren inguruko informazioa zabaldu du. THW Kielen aurkako partidan ezker belaunean jasandako bihurduraren ondoren egindako azterketek baieztatu dute jokalariak aurreko ligamentu gurutzatuaren haustura osoa duela, baita periferiako hausturak ere bi meniskoetan. Ondorioz, Barretok ebakuntza-gelatik igaro beharko du eta bere osatze-prozesua, epeak oraindik zehaztu gabe egon arren, hilabete askoz luzatuko dela aurreikusten da.
Klubak, ohar ofizial baten bidez, bere babes eta animo guztiak helarazi nahi izan dizkio jokalariari une zail honetan. Entitateak ziurtasun osoa du Unairen lanak, esfortzuak eta zaleen zein klub osoaren laguntzak jokalaria kantxetara indarberrituta itzultzea ahalbidetuko dutela.
