Bihar, urtarrilaren 10ean, hasiko da DokuIrun zinema dokumentaleko programaren zortzigarren edizioa. Irungo Udaleko Kultura Arloak antolatuta, iazko edizioaren arrakastaren ondoren, ostiral honetan Oskar Alegriak zuzendutako ‘Zinzindurrunkarratz‘ (2023) zintarekin hasiko da edizio hau. Guztira, 5 dokumental emango dira DokuIrun programaren zortzigarren edizioan.
Lehen hitzordu hori 19:00etan izango da, Amaia KZko auditorioan, eta sarrera doakoa izango da, baina aldez aurretik gonbidapena erretiratuta Amaia KZren webgunean eta leihatilan bertan, proiekzioa baino ordubete lehenago, betiere sarrerak eskuragarri badaude.DokuIruneko saioetan ohikoa den bezala, dokumentala ikusi ondoren, solasaldia egingo da Oskar Alegria zuzendariarekin, eta Ander Izaguirre kazetari eta idazleak gidatuko du.
Bere Super-8 eskuan, Oskar Alegría Zinzindurrunkarratz aitona-amonek Artazuko (Nafarroa) mendietan ibili zituzten bidexketara itzuliko da, familiaren memoria berreskuratzeko. Irudi mutu eta soinu itsuetatik abiatuta, filmak, eguneroko gisa eraikia eta izenburuak euskarazko ahoskera onomatopeikoari egiten dio erreferentzia: brisa arin bat (zinzin), erortzen den harri bat (durrundurrun) eta tximista batek jotako gailur bat (kurruzkarratz). Filmak zubiak zabaltzen ditu Jonas Mekas zuzendari ospetsuaren filmografiarekin.
Oskar Alegriari buruz
Zinemagilea, programatzailea eta zinema irakaslea, Oskar Alegriak (Iruñea, 1973) ‘Emak Bakia Baita’ (2012) filmarekin egin zuen debuta zuzendari gisa. ‘Zumiriki‘ (2019), Veneziako Mostrako Orizzonti sailean estreinatu zen, eta ez-fikziozko film onenaren saria irabazi zuen Sevillako Zinemaldiko Olatu Berriak atalean. ‘Zinzindurrunkarratz’ (2023) Tellurideko Jaialdian estreinatu zen.
DokuIrungo hurrengo hitzorduak
Hauek izango dira DokuIrungo 8. edizioko hitzordu guztiak:
– Izenburua: “A los libros y a las mujeres canto” (Maria Elorza, 2022)
Data: otsailaren 7an 19:00etan
– Izenburua: “Aún es tiempo de feminismo” (Zua Méndez, Teresa Lozano, 2022)
Data: martxoaren 14an 19:00etan
– Izenburua: “Scooter” (Andres Robleda, 2022)
Data: apirilaren 4an 19: 00etan
Gainera, Donostiako Giza Eskubideen Zinemaldian eta Aministía Internacional erakundearen eskutik, maiatzaren 9an, zinemaldiko film saritua proiektatuko da. Hitzordua 19: 00etan izango da.
DokuIruni buruz
DokuIrun zinema dokumentaleko programa bat da, ekoizpen hibridoak, esperimentalak eta gai sozialak jorratzen dituena. Programak areto komertzialetan normalean tokirik ez duten oraintsuko dokumentalak eskaintzen dizkie herritarrei, eta aurkezpenarekin eta solasaldiarekin batera gaiko protagonistaren edo adituren baten parte-hartzea izaten dute.
