Ekainaren 5ean ospatzen den Ingurumenaren Mundu Eguna dela eta, Ekoetxea Txingudik ingurumen-kontzientziazioa eta parte-hartze aktiboa sustatzeko egitarau berezia jarri du abian 2026ko ekainean zehar. Ekoetxea sareak naturaren zaintza eta jasangarritasuna herritarrei gerturatu nahi dizkie aurten ere, eta horretarako hiru jarduera nagusi uztartuko ditu bere espazioan: ekintza zuzena ingurunean, haurrentzako antzerkia eta sormen musikala.
Hondakinak biltzeko auzolana
Egitarauaren zutabe garrantzitsuenetako bat naturgunea bertatik bertara zaintzeko ekintza zuzena izango da. Europako garbiketarako mugimenduarekin bat eginez, boluntarioentzako saio bat antolatu da Txingudiko babestutako eremuan zaborrak eta hondakinak biltzeko. Hondakinen bilketa ekainaren 6an, larunbatean, goizeko 10:30etik 13:00etara egingo da eta bertan parte hartzeko gutxieneko adina 6 urtekoa da. Ekintza honen bidez ingurunea txukuntzeaz gain, gure planetako ekosistemetan plastikoek eta giza jarduerak eragiten duten kalteaz jabetzea eta gizartea kontzientziatzea bilatzen da.
Familientzako jolasak eta antzerkia
Datorren ekainaren 7an, igandea, goizeko 10:30etik 13:30era, “Izan ingurumen zaindari!” ekitaldi berezia ospatuko da Plaiaundiko Parke Ekologikoan, Ekoetxea Txingudik eta Txikis del Bidasoak antolatuta. 4 urtetik gorako haurrei eta haien familiei zuzendutako doako jarduera elebidun honek hiru orduko iraupena izango du, eta bizi garen ingurune naturala modu dibertigarri eta hezigarrian deskubritzea zein baloratzea du helburu. Parkera sartu bezain laster, familiek lau jarduera-gune aurkituko dituzte, adin guztierako jolas, dinamika eta sorpresekin; gutxienez jardueretako bat osatzean, kartilla bat zigilatu eta “ingurumena zaintzen duen familia” diploma lortu ahal izango dute.
Naturarekiko sormena eta konpromisoa probatzeko familia-esperientzia honek hiru eremu nagusi izango ditu: Birziklatutako materialekin musika-tresnak eraikitzea, ingurune naturala zaintzearen garrantziari buruzko hausnarketa eta naturaz gozatzea jokoetan, yinkanetan eta dinamiketan parte hartzen den bitartean.
Goizari amaiera borobila emateko, 12:30ean, Traka Matraka taldearen “Matraka ma non troppo” ikuskizunaz gozatu ahal izango da Ekoetxean. Testurik gabeko sorkuntza artistiko honek animalien bizitza bere ingurune naturalean eta harmonian ditu ardatz; zuzeneko euskal musika tradizionala erabiltzen du ikusleak abenturazko ibilbide interaktibo batean murgiltzeko.
Jarduera guzti hauetan parte hartzea erabat doakoa da. Hala ere, naturgunearen babesa eta saioen kalitatea bermatzeko, plazak mugatuak dira eta aldez aurretik izena ematea ezinbestekoa izango da Ekoetxearen webgune ofizialean txertatutako loturen bidez.
