Irudek Bidasoa Irunek atzo agurtu zen Europako lehiatik. Talde irundarrak 22-32ko markagailuarekin galdu zuen MT Melsungenen aurka, erasoan trabak izan zituelarik. Ondorioz, Hamburgoko Final Fourrerako sailkatzea ezinezko izan zaio Bidasoa Iruni
Partida erritmo biziarekin hasi zen, bi taldeen ezaugarria dena. Bisitariek markagailua menderatu zuten Caverok IRUDEK Bidasoa Irun aurretik jarri zuen arte, irundarrak tanto bateko aldearekin nagusi zirelarik (6-5, 10:23 minutuan). Ondorengo minutuetan, irundarrak eraginkorrak izaten jarraitu zuten ate aurrean eta Artalekuko markagailuan aurretik jarraitzen zuten, Bidasotarren zaleen bultzadarekin. Une horretatik aurrera, etxekoen gol lehortea etorri zen: ia 17 minutuz tanto bakar bat ere sartu gabe egon ziren atsedenaldira arte. MT Melsungenek etxekoen geldialdia baliatu zuen alde handitzeko, 0-9ko partzial batekin, eta horrek alemaniarren aldeko balantza makurtu zuen lehen 30 minutuak amaitzean. Markagailua 8-15ekoa zen atsedenaldian.
Bigarren zatia itxaropenez hasi zen Irudek Bidasoa Irunentzat, atsedenaldira iritsi ziren 8-15eko emaitza iraultzeko asmoz. Hala ere, etxekoen asmoak berehala zapuztu zituen MT Melsungen indartsuak, ez baitzuen inolako aukerarik eman. Sei minutu eskasetan, alemaniarrek 1-6ko partzial suntsitzailea sinatu zuten, eta Álex Mozasek hutsartea eskatu behar izan zuen bisitarien erasoak gelditzeko. Kolpe gogorraren aurrean ere, Artalekuko zaleek ez zuten momentu bakar batean ere animatzeari utzi, taldearen ahalegina eta dedikazioa aitortuz, nahiz eta aurrean askoz handiagoa zen aurkaria izan.
Minutuak aurrera zihoazen, eta markagailuko aldea handitzen jarraitu zuen. Bigarren zatiko denboraren erdia igaro zenean, bisitariak jada 11 goleko aldearekin nagusi ziren, euren eraso-eraginkortasunaren eta defentsa sendoaren erakusgarri. Irudek Bidasoa Irun ez zen sekula amore ematera joan eta amaierako minutuetan aldea murrizten saiatu zen, baina Melsungenen sendotasunak ezinezko egin zuen erreakzio saiakera oro. Amaieran, markagailuak 22-32koa erakutsi zuen alemaniarren alde, eta horrek MT Melsungenen sailkapena ziurtatu zuen Hamburgoko Final Fourerako. Irundarrak kanpoan geratu ziren, nahiz eta azken segundo arte erakutsitako ahalegina eta entrega nabarmenak izan.
