Giam Sneakers Irungo Zubiaurre kaleko 14. zenbakian ateak ireki berri dituen denda da. Zapatila esklusibo originalak saltzen dituen saltokia dugu. Henry Asprilla dendaren jabeak azaldu duenez, aurrez aurreko salmentan aritzeaz gain, mundu mailako bidalketak ere egiten dituzte. Eskaera edo kontsulta bat egiteko harremanetan jarri nahi duen orok 657282439 telefono-zenbakira dei dezake.
Horrelako negozio bat martxan jartzeko zapatilen zale amorratua izan behar da. Zure kasua da?
Bai, egia esan, bai. Txiki-txikitatik zapatilen oso zaleak izan gara, bai ni eta bai nire bikotekidea. Orain negozio horri ekiteko aukera izan dugu, nahiz eta lehenago ere sare sozialen bidez funtzionatzen genuen. Denda berri honen irekierarekin, eskualdeari gure lana eta produktuak hobeto ezagutzeko aukera eskaini nahi diogu.
Jendeak eskertu nahi du horrelako denda fisiko bat ireki izana Irunen?
Bada, egia esan, bai. Zabalik daramagun denbora laburra kontuan hartuta, jendea oso ondo erantzuten ari dela uste dugu. Jendea etortzen da ikustera zer zapatila ditugun, eta erosketaren bat ere egiten dute. Beraz, oso pozik gaude eta horrela jarraitzea nahi dugu.
Horrelako produktuak online saltzen dituzten plataforma eta kontu asko daude. Baina denda fisikoa izateak beste berme batzuk ematen dizkio bezeroari, ezta?
Hala da. Normalean marka handien webguneetan aurki daitezkeen produktuak dira, baina horrek ez du esan nahi denda fisiko batean bezain ikusgarriak izan daitezkeenik. Gure eskualdearen kasuan, Giam Sneakers da hemen ateak ireki dituen mota honetako lehen denda, eta horregatik gustatuko litzaiguke jendea bertara hurbiltzea.
Zapatila esklusiboen eskaria goraka doa azken urteetan. Zergatik?
Bai, batez ere hiri handietan gero eta gehiago ikusten den zerbait da. Hala ere, Bidasoaldean edo Gipuzkoan oso zaila da horrelako produktuak eskaintzen dituen denda bat aurkitzea.
Zehazki, zer produktu mota eskaintzen dituzue zuen dendan?
Guk Jordan edo Nike bezalako marken zapatilak erosi eta saltzen ditugu. Oso produktu esklusiboak direnez, zaila izango da inguruko denda fisikoren batean horiek aurkitzea.
“Hala ere, Bidasoaldean edo Gipuzkoan oso zaila da horrelako produktuak eskaintzen dituen denda bat aurkitzea”
Henry Aprilla, Giam Sneakers dendako saltzailea
Ez da erraza izan behar horrelako produktuak lortzea ondoren saltzeko. Nola egiten duzue?
Bada, marka handiek egiten dituzten salmentetan sartuz erosten ditugu, eta, horretarako, zozketetan parte hartzen dugu. Produktu jakin bat bilatzen dugunean, bildumazaleren batekin edo produktu horiek berriz saltzeko prest dagoen pertsonaren batekin trukea egiten ahalegintzen gara, betiere webgune ofizial batean egindako erosketaren batetik lortu baditu.
Zentzu horretan, neurri asko hartu behar al dituzue produktua originala dela bermatzeko?
Bai, egia esan, bai. Gure kasuan, % 100 originalak diren produktuekin lan egiten dugu bakarrik, eta beti saiatzen gara hala izan dadin. Hala ere, egia da zenbait produkturen birsalmentaz ari garenean beste saltzaileaz pixka bat fidatu behar duzula. Gure kasuan, saltzen eta berrerosten hainbeste urte igaro ondoren lortu dugun esperientziari esker, askoz zailagoa da nahi gabe faltsua den zerbait erostea. Produktu bat gure dendan saltzeko erosten dugun bakoitzean, produktu horren originaltasuna bide posible guztietatik egiaztatzen saiatzen gara.
Dagoeneko eskuragarri dituzuen produktuetatik haratago, produktu jakinak lortzeko enkarguak onartzen dituzue?
Bai, noski. Era guztietako zerbitzuak eskaintzen ditugu. Horregatik, produktu berri bat erosten dugunean, beti saiatzen gara egiaztatzen eta dena zuzen dagoela ikusten. Egiaztagiriren bat izanez gero, beti saiatuko gara erosketa egin den webgunearen bidez dena ondo dagoela eta produktua originala dela egiaztatzen. Horrela, guk aldez aurretik geure egiaztapenak egiteaz gain, bezeroari aukera eman diezaiokegu egiazta dezan eta gugan konfiantza osoa izan dezan.
Zeintzuk dira une honetan gehien eskatzen diren zapatilak?
Ba normalean asko eskatzen dizkigute Jordan estilokoak, zehazki, Jordan 3, Jordan 4 edo Jordan 1 estilotakoak. Moka hauek ere baditugu, duela gutxi atera berri dira eta oso produktu eskatua dira. Horregatik ere, sasoiko produktuekin jolasten saiatzen gara, gure bezeroei momentuko esklusiboenak eta modakoak eskaini ahal izateko.
“Gure kasuan, saltzen eta berrerosten hainbeste urte igaro ondoren lortu dugun esperientziari esker, askoz zailagoa da nahi gabe faltsua den zerbait erostea”
Henry Aprilla, Giam Sneakers dendako saltzailea
Esango zenuke inguru honetan jende askok erosten dituela horrelako produktuak?
Gero eta gehiago esango nizuke. Nik, behintzat, kalean nabilenean, jende asko ikusten dut produktu oso esklusiboekin. Horrek asko pozten nau, bezero posible asko ditugula esan nahi duelako. Egia da jendeari gero eta gehiago gustatzen zaiola modara joatea, batez ere zapatilekin, eta hori oso garrantzitsua da guretzat.
Horretarako, zuei dagokizue hurbiletik jarraitzea zeintzuk diren uneoro merkatuko joera berriak.
Bai, nola ez. Guk produktu fresko eta berriak ekarri nahi ditugu Euskal Herrira, jendeari erakargarri gerta dakizkion. Horregatik, gure helburuetako bat da ahalik eta produktu gehien ekartzea, urte honetako merkaturatze berrietatik aukeratuak, batez ere.
Nola begiratzen diozue etorkizunari Giam Sneakesetik?
Lehenik eta behin Irunen bertan eta inguruetan ezagutaraztea da gure lehen helburua. Gure hurrengo proiektua Donostian denda bat irekitzea izango litzateke. Baina, oraingoz, desiratzen gaude nahi duen oro bisitan etor dakigun, eta ateak zabalik egingo diogu harrera.
