Irungo Udaleko Gizarte Ongizateko Arloak, Adinekoentzako Zentroak Dinamizatzeko Zerbitzuaren bidez, abuztuko egitarau zabala aurkeztu du hiriko Adinekoentzako Guneetarako. Guztira 26 jarduera antolatu dira hilabete osoan zehar, adineko pertsonen artean aktibazio fisiko zein mentala bultzatzea, mugikortasuna sustatzea eta elkarren arteko sozializazioa nahiz elkarbizitza komunitarioa sendotzeko asmoz. Ekimen honen bidez, auzo bakoitzeko zentroak komunitatearen eta aisialdi osasungarriaren elkargune bihurtuko dira berriro ere udako bigarren hilabete honetan.
Egitarauaren barruan hainbat proposamen berezi eta berritzaile nabarmentzen dira. Teknologia berrien alorrean, Palmera-Montero guneak errealitate birtualeko saio bereziak hartuko ditu, eta hara hurbilduko dira Behobia (abuztuaren 18an), Luis Mariano (abuztuaren 20an) eta San Migel (abuztuaren 27an) zentroetako kideak. Horrez gain, abuztuaren 28an itsasontzi gaineko jaialdi eivissarra egingo da Fraideen kalara irtenez Anaka-Puiana eta Belaskoeneako erabiltzaileentzat. Bestalde, herriko tradizioei eutsiz, Luis Mariano, Palmera-Montero eta San Migeleko adinekoek Irungo Euskal Jira ikusteko eta jai-giroaz gozatzeko txangoa egingo dute abuztuaren 8an.
Natura ibilaldiek eta osasun zein kultura tailerrek ere toki garrantzitsua izango dute abuztuko egutegian. Irasoko eta Kateako kideek Irundik Abenida zubirainoko txango kulturalak egingo dituzte (abuztuaren 20an eta 5ean, hurrenez hurren), eta Palmera-Monteroko adinekoek Plaiaunditik zeharreko ibilaldia (abuztuak 14), Ibarlako irteera (abuztuak 22) zein Nagusilan elkartearen ‘Nagusikleta’ bizikleta-ibilaldia (abuztuak 28) izango dituzte aukeran. Horrez gain, Behobiako zentroan ahots-teknika, antzezpena, inprobisazioa eta gorputz-adierazpeneko tailerrak emango dira astero.
Programa zabal hau osatzeko, ikus-entzunezko saioak eta diziplina espezifikoak eskainiko dira auzo ezberdinetan. Belaskoenean eta San Migeleko zentroetan zine-saioak antolatu dira, ‘El club de los milagros’ (abuztuak 1) eta ‘Madame Cliquot’ (abuztuak 22) bezalako filmekin. Lekaeneako kideek aulki gaineko tai jia lantzeko aukera edukiko dute abuztuaren 25ean, Anaka-Puianan memoria sensitiboaren inguruko saio bat egingo dute abuztuaren 11n eta Behobiako zentroak auzoko jaietan parte hartuko du abuztuaren 1ean linea-dantzarekin eta kriskitinekin, hiriko adineko guztiei abuztu dinamiko, osasuntsu eta sozialki aberatsa bermatzeko.
