Irungo Etxebizitza Sozietate Publikoak (IRUNVI), Administrazio Kontseiluan, Txenpereneako eremua urbanizatzeko proiektua idazteko kontratazioa onartu du. Pausu horrek jarraipena emango die proiektua etorkizunean garatu ahal izateko orain arte egindako urratsei. Kontratuaren balio zenbatetsia 300.000 eurokoa da, eta 24 asteko epea dago idazteko.
Joan den urrian onartu zen behin betiko Urbanizatzeko Jarduketa Programa (JUP), 850 etxebizitza eraikitzea aurreikusten duen eremu baten etorkizunarekin aurrera egin ahal izateko funtsezko aurretiko urratsa, 663 etxebizitza publiko izanik (ia % 80).
Kontratuaren balio zenbatetsia 300.000 eurokoa da, eta 24 asteko epea dago idazteko. Gainera, eremua kudeatzeko sistema lankidetza izango da, San Miguel-Anakan bezala, eta IRUNVI izango da horren kudeaketaz arduratuko den erakundea, jabeen partaidetzarekin, horrela garapen ordenatua eta interes publikokoa bermatzeko.
Irungo Udalak aurrera egin du horrela, Plaiaundiko kirol-instalazioen lekualdaketa lehenbailehen egin dadin. Cristina Laborda Irungo alkatearen arabera, atletismo eta errugbi kluben eskaera historiko bat konponduko litzateke: “Txenperenearen garapena da agendan gorriz markatuta daukagun helburuetako bat. Gaur egun Plaiaundin kirola egiten duten klubei erantzuna eman nahi diegu, eta, jakina, hiriko etxebizitzaren arazoari modu integralean heldu; izan ere, eremu hori lortzean, guztira 850 etxebizitza eraiki ahal izango ditugu, zati handi bat babes publikokoa izateaz gain “.
Txenperenearen etorkizuna
Txenperenea eremuko lurrak Irungo hiri-bilbearen hegoaldean daude, iparraldean Lapitze auzoa eta hegoaldean Bilbao – Behobia autobidea. Gogoratu behar da Udalbatzak, 2023ko abenduaren 29an, eremuaren Hiri Antolamenduko Plan Orokorraren (HAPO) aldaketa behin betiko onartzea erabaki zuela, horrela, udal-lurraldearen zati horren hiri-antolamendu berria ezarriz.
Jarduera-eremuak 163.527 m²-ko azalera hartzen du guztira, erabileraren arabera hainbat eremutan banatuta. 20.381 m² kirol-ekipamendurako, 52.062 m² berdeguneetarako eta 17.642 m² beste ekipamendu batzuetarako. Gainera, 39.411 m² lurzati eraikigarriei dagozkie, hau da, guztizkoaren % 24, zuzkidura-bizitokietarako 1.519 m² eta hirugarren sektoreko lurzoru finkaturako 1.460 m² barne. Bestalde, bideetarako azalera 31.052 m²-koa da.
Eraikigarritasunari dagokionez, bizitegi-erabilera 74.440 m²-ra iristen da, eta 850 etxebizitza inguru eraikitzeko aukera ematen du; horietatik % 77,82 (660 unitate inguru) babes publikoko etxebizitzetarako izango dira. Eraikigarritasun horretatik, 1.610 m² eraikin finkatuari dagozkio, eta 72.830 m² eraikuntza berriari. Gainera, merkataritza-eraikigarritasun tertziarioko 9.200 m² aurreikusten dira.
Eremua etxebizitza-programa baten bidez antolatzen da, babes ofizialeko etxebizitzen eta etxebizitza libreen parkea sortzeko aukera ematen duena. Gainera, HAPOn katalogatutako Altzulegarre baserriaren kontserbazioa bermatzen du.
Eremuaren ezaugarri nagusietako bat gaur egun Plaiaundiko Parke Ekologikoan dauden kirol-instalazioak kokatuko diren lurzati bat sartzea da, horrela, eremu babestu horretatik kanpo lekualdatzea ahalbidetzeko.
Azkenik, parke lineal handi bat diseinatu da, bizitegi-eremua antolatuko duena eta luzetara Alai Txokoko parkearekin eta Egiluzeko finkako zuhaiztiarekin lotuko duena, bai eta harekin batera joango diren ekipamendu publiko batzuekin ere.
