Txingudiko Elkarte Feministak Bidean proiektua martxan jarri du, Emma Larretak sustatutako proiektua, genero-indarkeria egoerak bizi izan dituzten emakumeei zuzendutako akonpainamendu integraleko espazioa. Proiektua elkarteak emakumeen berreskuratze, zaintza eta indartze pertsonal eta komunitarioaren alde egiten duen lan-ildo jarraituaren barruan kokatzen da. Proiektuak Gipuzkoako Foru Aldundiaren babesa du.
Bidean ehun soziala sortzean eta elkarren arteko babesean oinarritutako proiektua da, eta isolamendua apurtzea, konfiantza berreskuratzea eta taldearen indarra balioan jartzea du helburu, berreskuratze-prozesuetan funtsezko elementu gisa. Espazio seguru eta zaindu baten bidez, emakume bakoitzaren erritmoak eta beharrak errespetatuz, autonomia pertsonala berreraikitzen laguntzen du.
Bidean proiektua
Bidean, Emma Larretak bultzatutako proiektua, berreskuratze integrala eta birgizarteratze kontzientea ardatz dituen metodologia baten bidez garatzen da. Ulertzen da bizitako esperientziek ibilbide pertsonala markatzen dutela, baina ez dutela etorkizuna baldintzatu behar. Talde-lanak esperientzia ikaskuntza bihurtzea eta prozesu indibidualak ikuspegi komunitario eta feministatik indartzea ahalbidetzen du.
Saioetan dinamika indibidualak eta taldekoak, solasaldiak eta topaketak uztartzen dira, aire libreko jarduerak barne, zintzotasunez, erantzukizunez eta norbanakoen erritmoak errespetatuz akonpainamendua eskaintzeko helburuarekin.
Programa honen bidez, Txingudiko Elkarte Feministak indarkeria matxisten aurrean prozesuetan oinarritutako arreta-ereduarekiko konpromisoa indartzen du, profesionaltasuna eta zaintza ardatz hartuta, eta ekintza puntualetatik harago, akonpainamendurako espazio egonkorrak sustatuz.
