Udalak joan den abuztuan 2025eko itzulera-operazioaren harira egindako jarduketaren eta polizia-operatiboak abuztuan zehar Irunen trafikoa etetea ekidin dute berriro. Cristina Laborda Irungo alkateak eta Iñigo Bergés Herritarren Segurtasun eta Bizikidetzarako ordezkariak aurtengo dispositiboaren balantzea egin dute gaur goizean Udaltzaingoaren komisarian eta balorazioa oso positiboa izan da.
Azken urteotan inplementatu da dispositibo berezi hau, 2022ko udan hirian izandako kolapsoa saihestu nahian. Ordutik, Irunen finkatu egin dira dagoeneko, Frantziako mugatik Europako iparralderako norabidean igarotzen diren ibilgailuen bolumen handiari aurre egiteko neurriak.
Operatibo koordinatua
Operatiboa Ertzaintza, Hondarribiko Udaltzaingo, Eusko Jaurlaritzako Trafiko Saila, Bidegi eta beste erakunde batzuekin koordinatu da, hirigunean kolapsoak saihesteko eta hiriko pasabide nagusietan arintasuna bermatzeko. Horretarako, Irungo kaleetan hainbat agente, seinale espezifikoak eta trafikoa erregulatzeko neurriak zabaldu ziren, ibilgailuak behar bezala bideratzeko eta auto-ilarak murrizteko.
Alkatearen hitzetan, dagoeneko hiru urte dira hirian ekintza plan hau martxan dutela:”urtero ikusten dugu hobekuntza hori, egiten ari garen ukituei eta akats berberak ez egiteko ikaskuntzari esker”. Cristina Labordaren hitzetan, “dagoeneko atzean geratu dira hiriak 2022ko udan neurri horien ezarpenari esker bizi izan zituen auto-ilara handiak. Alkateak Udaltzaingoak eta gainerako administrazio eskudunek egindako lan handia nabarmendu du.
Bestalde, Iñigo Bergés ordezkariak adierazi duenez, 2025eko operatiboak erakutsi du aurretiko plangintzaren eraginkortasuna, erakundeen arteko koordinazioa eta hedatutako giza errefortzua eta errefortzu materiala. “Agente titularren, bitartekoen eta laguntzaileen jarrera funtsezkoa izan zen arrakasta lortzeko”, azpimarratu du Herritarren Segurtasun eta Bizikidetzarako ordezkariak. Gainera, seinaleztapen egokiak eta hartutako neurriek (itxitura puntualak, zirkulazioa bideratzea, oinezkoen pasabideak kentzea eta semaforoak doitzea) zirkulazioan zeuden ibilgailuak abiadura handian ebakuatzea ahalbidetu zutela azaldu du Bergések, Irunek aurreko urteetako kolapso masiboak ekiditea lortuz”.
Ia 3 astez martxan
Udaltzaingoak abuztuaren 14tik 30era diseinatu eta zuzendu zuen dispositiboa, eta, horren ondorioz, hiru astebururi, estatuko jaiegunei eta Frantziara doazen ibilgailuen itzulera-data masiboei aurre egin behar izan zien. Zehazki, 19 agente aritu ziren Oinaurre eta Letxumborro bezalako puntuetako bidegurutzeak eta desbideratzeak estaltzen, hirigunearen eta iparraldeko saihesbidearen (GI-636) arteko karga orekatzeko eta aldi berean kolapsoak saihesteko.
Gainera, 103 hesik, 81 direkzio- eta debeku-kartelek eta 60 puntu estrategikotan banatutako 75 konok, semaforizazioa indartzearekin batera, Iparralde etorbideko eta Behobiako merkataritza-guneko funtsezko oinezkoentzako pasaguneetan denbora berdea zabaltzearekin eta semafororik gabeko oinezkoentzako pasabideak kentzearekin eta ibilgailuen ebakuazioa arintzeko semaforizatu batzuk mugatzearekin batera, helburua betetzen lagundu zuten.
Guztira, hiru egunetan (abuztuak 19, 22 eta 29) auto-ilara ertainak izan dira, puntu kritikoetan agenteak indartuz kontrolatu zirenak. Bestalde, ez zen auto-ilararik izan AP-8tik Irunerako sarbideetan, ezta kolapso larririk ere hiri barruan, polizia-dispositiboaren helburu nagusia betez.
