Abuztuan aurreikusten de “Itzulera Operazioa” dela eta, Irungo Udaltzaingoak aktibo mantenduko du trafiko dispositibo berezia. Mugako inguruan sortu daitezkeen trafiko afekzioak ahalik eta gehien arintzea bilatzen da. Izan ere, abuztuko bigarren hamabostaldian iparraldera oporretatik itzultzen diren ibilgailuen kopurua asko handitzen da.
Dispositiboa joan den abuztuaren 7an, ostegunez, aktibatu zen eta ordutik seinaleztapen-elementuak hiriko sarbide eta puntu estrategiko nagusietan zabalduta daude. Udan ohi den bezala, abuztuan, ibilgailu gehien pilatzea aurreikusten den egunetan, udaltzainek trafikoa kontrolatu eta erregulatzeko dispositibo berezi batean parte hartzen dute, Ertzaintzarekin koordinatuta, muga gurutzatu nahi duten ibilgailuen kopuru handiak ahalik eta eragin gutxien izan dezan hiriko erdiguneko zirkulazioan.
Cristina Laborda alkateak azpimarratzen du “operatibo honek, Irunera iritsi nahi duten tokiko ibilgailuei sarbidea lehenesten die, aurreko urteetan eraginkorra izan dela frogatu du. Irungo Udalak Eusko Jaurlaritzarekin, Gipuzkoako Foru Aldundiarekin eta Ertzaintzarekin duen erakundeen arteko lankidetzari esker, trafiko-intentsitate handiagoko momentu puntual horietan, gune batzuetako auto-ilarak eta blokeo puntualak nabarmen murriztea ahalbidetzen da”.
Segurtasun perimetroa
Dispositiboaren helburuetako bat GI-636 errepidetik Frantziara doazen ibilgailuen trafikoa arina izan dadin bermatzea izango da. Horretarako, hiriko erdigunetik datozen ibilgailuak errepide horretan sartzea eragozten duten neurriak hartzen dira, baita oinezkoentzako hainbat pasabide kentzea eta semaforoen denborak aldatzea ere, bai Santiagoko mugako sarbideetan, bai Behobiakoan.
Gainera, hiria inguratuko duen segurtasun perimetro bat ezarriko da, AP-8 errepidearen eta hego ingurabidearen lotunetik ospitaleko biribilguneraino, erdigunean zirkulazioa normala izatea bermatzeko, eta muga gurutzatu nahi duen ibilgailurik hiri barnean sartzea eragozteko.
Trafiko gehien aurreikusten den egunetan, Udaltzaingoko agenteek zainduko dute hiria ez dadila kolapsatzera iritsi, ekintza-planean jasota dauden afekzio-guneak kontrolatuz, herritarrei informazioa emateko eta trafikoa antolatzeko, bai barnekoa, bai Itzulera Operaziokoa, helburuarekin.
Gomendio orokor gisa, hiriko saihesbidea edo GI-636 errepidea eta AP-8 autobidea ere mugaren noranzkoan Irungo hiri barnetik ez erabiltzea gomendatzen da, egun hauetan trafiko handia aurreikusten baita. Era berean, garraio publikoa erabiltzea gomendatzen da, eta ahal bada, garraio pribatua saihestea, barruko zein kanpoko joan-etorrietarako.
