Euskal Herria-Kuba Ekimena herri ekimenak eta Euskadi-Kuba elkarteak material eta diru bilketa berezia abiatu dute, Kubako herriak pairatzen duen blokeo inperialista eta “ankerrak” eragindako egoera kritikoari aurre egiteko. Egoera horretan laguntzeko, diru-ekarpenaz gain, Kabigorri Bidasoaldeko Ateneoak material bilketa antolatu du apirila amaiera eta maiatza hasirarako.
AEBetako Gobernuak ezarritako gerra ekonomikoak eta petrolio-blokeoak ondorio larriak utzi ditu uhartean, eta horren aurrean, euskal elkartasuna aktibatu da “Argia eta indarra Kubarentzat” lelopean. Kanpainak arrakasta handia izan du jada, hilabete bakarrean 180.000 euro biltzea lortu baitute euskal kulturako 130 erreferenteren babesari esker.
Diru hori Habanako William Soler Unibertsitate Ospitale Pediatrikoko Poliklinikoari autonomia elektrikoa emateko erabiliko da, eguzki-energia fotovoltaikoko instalazio oso bat erosiz eta bertara bidaliz. Euskal gizartearen aldetik jasotako erantzun aparta ikusita, antolatzaileek funtsak biltzeko epea maiatzaren amaierara arte luzatzea erabaki dute. Helburu berria 244.000 eurora iristea da, ospitale bereko ospitalizazio-eremurako bigarren eguzki-panel instalazio bat bermatu ahal izateko. Proiektuaren alderdi teknikoa mediCuba-Europa GGKEak kudeatuko du.
Material bilketa
Diru-ekarpenez gain, material bilketa handia egingo da apirilean eta maiatzean zehar. Zehazki, apirilaren 23, 24, 25 eta 30ean, eta maiatzaren 1, 2, 7, 8 eta 9an egongo da aukera materiala emateko, arratsaldeko 19:00etatik aurrera. Antolatzaileek hainbat sailkapen ezarri dituzte beharrezkoak diren produktuen artean: osasun materiala (2027tik aurrera iraungitzen diren sendagaiak eta tresna kirurgikoak), elikadura-osagarriak (bitaminak eta mineralak), eta iraungitze-data luzea duten elikagai ez-galkorrak (arroza, lekaleak, olioa edo esne hautsa, besteak beste).
Hygienarako eta garbiketarako produktuak ere lehenetsiko dira, hala nola konpresak, pixoihalak, erratzak eta trapuak. Horrez gain, kirol materiala (baloiak, bizikletak edo ekipamenduak) eta eskolako tresnak (arkatzak, koadernoak eta margoak) jasoko dira; azken honetan, ordea, argitu dute ez dutela testulibururik ez entziklopediari onartuko. Material guztia Euskadi-Kuba elkartearen bidez bideratuko da zuzenean uhartera.
Herritarrek diruz lagundu nahi izanez gero, Laboral Kutxako kontu korronte baten bidez (ES35 3035 0134 43 1340 0592 71) edo Bizum bidez (04713 kodea erabiliz) egin ditzakete ekarpenak. Ekimen honekin, Euskal Herriko eragileek berretsi egin dute Kubako herriarekin duten konpromisoa, blokeoaren ondorioak arintzeko eta oinarrizko zerbitzuetan, hala nola osasungintzan, hobekuntza zuzenak eragiteko.
