Irungo Hezkuntza arloak jakinarazi du datorren maiatzaren 4tik 15era bitartean egongo dela zabalik 2026/2027 ikasturterako Musika eta Dantza Eskolan nahiz Udal Kontserbatorioan sartzeko proban izena emateko epea. Sandra Caballero Hezkuntza eta Gazteria ordezkariak eta Amaya Liceaga zentroko zuzendariak aurkeztu dute deialdia, irundarrek euren alderdi artistikoa lantzeko eta gustu guztietarako daukaten aukera paregabe hau azpimarratuz.
Eskaintza zabal horren barruan, lau urtetik gorakoentzat zein helduentzat zuzendutako musika-tresna eta musika-talde eskolak aurki daitezke, sei urtetik aurrerako dantza-klaseekin batera, betiere maila eta adin guztietara egokituta.
Izen-emate prozedura
Izena eman eta taldeak osatu ostean, ekainaren 1ean argitaratuko dira zerrendak eta ordutegiak, eta interesdunek uztailaren 2tik 15era bitartean baieztatu beharko dute matrikula ezinbestean. Plaza behin betiko finkatzeko, lehenengo ordainketa uztailean bertan egingo da, eta gainerako dirua sei epetan zatituko da urria eta martxoa bitartean. Kontuan izan behar da, halaber, ikasturtea behin hasita zenbateko osoa ordaintzeko betebeharra hartzen dela, nahiz eta ikasleak edozein unetan baja hartu erabaki. Prozesuari, tasei zein gainerako xehetasunei buruzko informazio zehatza Irungo Udalaren webgune ofizialean dago jada eskuragarri bertaratu nahi dutenentzat.
Ahalmen ekonomikoaren araberako ordainketa
Aurtengo berritasun nagusietako bat ahalmen ekonomikoaren araberako ordainketa-sistemaren baldintza berriak dira, tarifak eskuragarriago egiten dituzten errenta-tarte zabalduekin. Era horretan, lehenengo tarteak 19.417 eurora arteko diru-sarrerak hartzen ditu; bigarrenak 19.417,01 eurotik 29.911 eurora bitartekoak; hirugarrenak 29.911,01 eurotik 37.136 eurora artekoak; eta azkenik, kopuru horretatik gorakoentzat goiko tartea aplikatuko da. Sarrera horiek kalkulatzerako orduan, hainbat kenkari aplikatzeko aukera egongo da hogeita bi urtetik beherako ondorengoak izateagatik, desgaitasun-egoerengatik edota guraso bakarreko familiak izateagatik. Azkenik, Udalari iaz datu ekonomikoak kontsultatzeko baimena eman zioten herritarrek ez dute aurten izapide hori berriro egin beharko, aurten ere automatikoki aplikatuko baitzaie.
