Txingudiko Zerbitzuak-ek Merka2dasoa bigarren eskuko azokaren edizio berri bat antolatu du datorren maiatzaren 23rako. Hitzordua Irungo Zabaltza plazan izango da, goizeko 10:00etatik eguerdiko 14:00etara bitartean. Ekimen honen helburu nagusiak kontsumo ohitura arduratsuagoak sustatzea, objektuei bigarren bizitza bat ematea eta hondakinen sorrera murriztea dira. Era berean, berrerabilera praktika irisgarri gisa bultzatu nahi da, bigarren eskuko merkatuen balioa nabarmenduz.
Parte-hartzea zabalik
Azokan parte hartzea erabat irekia eta doakoa da herritar guztientzat. Bigarren eskuko objektuak saltzeko postua jarri nahi duten pertsonek Txingudiko Zerbitzuak-eko webgune ofizialean eskuragarri dagoen galdetegia bete behar dute izena emateko. Izen-emate hori burutzeko epea maiatzaren 16ra arte egongo da zabalik, baina antolatzaileek zehaztu dutenez, lekurik geratuko balitz epea maiatzaren 20ra arte luzatzeko aukera egongo da. Araudiari dagokionez, salgai jartzen diren artikulu guztiek erabilitakoak eta egoera onean daudenak izan behar dute derrigorrez. Hortaz, erabat debekatuta dago produktu berriak, stock-ekoak edota berariaz saltzeko sortutako eskulangintza, bitxigintza zein artelanak eskaintzea plaza horretan.
Aurreko edizioetan egin bezala, Merka2dasoak gordailuko salmentarako gune espezifiko bat ere izango du erabilgarri. Gune horretan, edonork gehienez hamar objektu erregistratu ahal izango ditu, eta antolakuntzak berak hartuko du bere gain material horien kudeaketa zein balizko salmenta azokan zehar. Zerbitzu hori erabili ahal izateko, nahikoa izango da egunean bertan plazan jarriko den informazio gunera hurbiltzea materialarekin. Azkenik, gogoratu behar da sendotuta dagoen ekimen honen barruan Txingudiko Zerbitzuak-ek urtero bost Merka2dasoa azoka antolatzen dituela. Horietatik hiru izaera orokorrekoak izaten dira, mota guztietako bigarren eskuko objektuekin, eta beste biak bizikletei bereziki eskainitakoak, guztietan parte-hartzea doakoa izanik izaera irekia bermatzeko.
