Gipuzkoako Foru Aldundiak sustatutako ‘Ongizatearen Plaza‘ ekimena Irunera iritsiko da datorren asteazken eta ostegunean, urriaren 7an eta 8an. Zabaltza Plazan kokatuko den gune ireki eta berritzaile honetan pertsonen ongizate osoa komunitatetik eta ikuspegi kolektibotik lantzeko hainbat jarduera antolatu dira, goiz zein arratsaldez.
Asteazkenean, urriak 7, egitaraua 10:00etan abiatuko da Adinberriren eskutik: lehenik Iñigo Vicensek gidatutako kirol saio irekia egingo da, eta segidan Raquel Rodriguezen mindfulness terapia nahiz Naia Rosen estimulazio kognitiboko tailerra eskainiko dira. 11:30etik 13:00etara, nahi ez den bakardadeari aurre egiteko mahai-ingurua egingo da Nagusilan, Bidasoa Zurekin, Itxaropen Telefonoa, Gurutze Gorria eta Itziar Sistiaga idazlearekin. Arratsaldean, 17:00etatik 18:00etara, Endaneak landaregintza tailerra bideratuko du etxe osasuntsuagoak sortzeko gakoekin, eta 18:00etatik 19:30era, heriotza, tabuak eta dolu prozesuak aztertuko dira Bidasoa Zurekin elkarteko profesionalekin zein lehen pertsonako testigantzekin.
Ostegunean, urriak 8, jarduerak 10:00etatik 11:30era berriro abiatuko dira Elikaeneako Anne Otegik eta Mugarrieta Ganadutegiko Ion Areitiok emango duten gosari osasuntsuen tailerrarekin. Jarraian, gazteen ongizatea, sare sozialekiko adikzioak eta hiperkonexioaren eraginak izango dira eztabaidagai gazteen beren parte-hartzearekin. Arratsaldean, 18:00etan, Cristina Lajas dietista-nutrizionistak perimenopausian eta menopausian elikadurak duen papera aztertuko du, eta 19:00etatik 20:00etara, migrazio-prozesuak bizi izandako pertsonen esperientziak eta harrera-bideak entzun ahalko dira. Bi eguneko topaketari amaiera komunitarioa emateko, Txorimaloak Soinu Taldeak eta Elatzetako Kantu Lagunek Zabaltza Plaza girotuko dute.
