Irungo Udalak, Herritarren Segurtasunerako eta Bizikidetzarako Arloaren bidez, baliabide berriak jarri ditu Udaltzaingoaren eskuetan, mugikortasun pertsonaleko ibilgailuen (bereziki, patinete elektrikoen) kontrola zorroztu eta araudiaren betetzea bermatzeko. Ostiral honetatik bertatik aurrera, agenteek doitasun handiko dinamometro eramangarri berri bat izango dute, kalean bertan ibilgailu horien prestazioak eta abiadura modu azkar zein zehatzean neurtzeko.
Aparatu ziurtatu honi esker, patinete elektrikoek baimendutako gehienezko abiadura (25 km/h) gainditzen ote duten egiaztatu ahal izango da, eta hala balitz, araudia betetzen ez duten ibilgailuak erretiratzeko aukera izango dute agenteek.
Araudi berria betez
Neurri hau bat dator joan den urriaren 1ean indarrean sartu zen Zirkulazio Erregelamendu Orokorraren erreformarekin. Erreforma honen arabera, patinete elektrikoa gidatzeko gutxienez 15 urte izatea eskatzen da orain, eta ezinbestekoa da kaskoa erabiltzea eta ibilgailuak argiztapen-sistema izatea. Gainera, ikusgarritasun urriko baldintzetan, txaleko islatzailea nahitaezkoa izango da.
Ildo horretan, Herritarren Segurtasunerako Arloak gogorarazi du erabat debekatuta dagoela patinete elektrikoak edo bizikletak espaloitik ibiltzea. Arau hori betetzen dela ziurtatzeko, Udaltzaingoak kontrol espezifikoak egingo ditu, mugikortasun-eredu berrien eta oinezkoen arteko bizikidetza bultzatu eta espazio publikoaren erabilera segurua bermatzeko asmoz.
