Irungo Udala informazio kanpaina bat egiten ari da, Herritarren Segurtasuna eta Bizikidetza arloaren bidez, Mugikortasun Pertsonaleko Ibilgailu Elektrikoen (MPI) erabiltzaileei bideratuta, datozen hilabeteetan ibilgailu horien zirkulazioko erantzukizun zibilari eta aseguruei dagokienez izango diren lege aldaketen berri emateko. Mugikortasun Jasangarriko ordezkari Sergio Javierrek eta Herritarren Segurtasuna eta Bizikidetzako ordezkari Iñigo Bergesek, Udaltzaingoko agente eta auxiliarrekin batera, xehetasun guztiak eman dituzte prentsaurrekoan.
Sergio Javierren esanetan, “patinete elektrikoa mugikortasun-elementu bat gehiago da hiriaren barruan, eta, bere alderdien artean, jasangarria dela eta zaratarik sortzen ez duela nabarmendu beharra dago, nahiz eta pedagogia eta kontrola behar dituen bizikidetzatik egingo den mugikortasuna bermatzeko, errespetutik pertsonen segurtasuna ziurtatuz. Aplikatzen diren neurri guztiak prozesu horretan ongi etorriak izango dira”.
Iñigo Bergesek, bere aldetik, azpimarratu du “garrantzitsua dela gisa honetako informazio kanpainak egitea hiriko hainbat gunetan, ikastetxeetan eta merkataritza guneetan, besteak beste, Udaltzaingoko agenteen eta laguntzaileen bitartez. Mugikortasunaren esparruan etengabeko prozesuan murgilduta gaude, eta Herritarren Segurtasunaren eta Bizikidetzaren arloan lan egiten dugu ibilgailu horien erabiltzaileek ahalik eta informazio gehien izan dezaten eta galtzadan gainerako ibilgailuekin bizi daitezen”.
Datozen arau aldaketak
5/2025 Legeak aldatu egin du ibilgailu motordunen zirkulazioko erantzukizun zibilari eta aseguruei buruzko legeria, eta aldaketarik nabarmenena izan da aseguru horiek mugikortasun pertsonaleko ibilgailu elektrikoetara (MPI) zabaltzea. Gainera, Ibilgailu Pertsonal Arinen (HPS) legezko kategoria sortzen da, fabrikazioko gehieneko abiadura 25 km/h-koa (25 kg baino gutxiago pisatzen badute) edo 14 km/h-koa (25 kg baino gehiago pisatzen badute) izan dezaketen motor elektrikoa duten plaza bakarreko ibilgailuentzat. Kategoria horretarako aseguru araudia zehaztu bezain laster, datorren urtearen hasierarako aurreikusia, erabiltzaileei jakinaraziko zaie.
Horrela, urtarrilaren 26tik aurrera, orain arte ibilgailu motorduntzat hartzen ez ziren ibilgailu guztiek (25 km/h-tik gora egiten dutenek edo 25 kg baino gehiago pisatzen dutenek eta 14 km/h-ra iristen direnek) erantzukizun zibileko aseguru bat izan beharko dute indarrean zirkulatu ahal izateko, autoaren edo motorraren nahitaezko aseguruaren antzekoa, baina estaldura egokituekin. Aseguru hori ez edukitzeak ibilgailua ibilgetzea ekarriko du.
Gainera, mugikortasun pertsonaleko ibilgailu elektrikoak Trafikoko Zuzendaritza Nagusiak (DGT) kudeatutako erregistro publiko berri batean erregistratu beharko dira, zirkulazio ziurtagiria (homologazioa) lortu beharko dute eta identifikazio etiketa edo plaka ikusgarri bat eraman beharko dute. Zirkulazio ziurtagiria eta etiketa edo plaka ikusgarririk ez dutenek 2027ko urtarrilaren 22ra arte bakarrik zirkulatu ahal izango dute; une horretatik aurrera, patinete elektriko homologatuek bakarrik zirkulatu ahal izango dute.
Arau aldaketa garrantzitsu hori patinete elektrikoen erabiltzaileen artean ezagutarazteko, informazioa emateko diptiko bat banatu da Irungo Bigarren Hezkuntzako, Lanbide Heziketako eta Batxilergoko hainbat ikastetxetan. Gainera, Udaltzaingoko agente laguntzaileak ere diptiko horiek banatzen ari dira hirian patinete elektrikoekin zirkulatzen duten pertsonen artean.
Datozen arau aldaketez gain, diptiko honetan gogorarazten da debekatuta dagoela espaloietan eta oinezkoen guneetan zirkulatzea, eta pertsona bakarrak erabiltzeko direla. Era berean gogorarazten da patinete elektrikoak zer elementu eduki behar dituen nahitaez (frenoak, txirrina eta, gauez, argiak eta islatzaileak), debekatuta dagoela aurikularrak eta mugikorra erabiltzea zirkulatzean, eta kaskoa eramatea gomendatzen dela ibilgailu horien istripu tasa handia dela eta.
