Urriarekin batera itxi da Lapurriturriko informazio-puntuaren 2026ko denboraldia, eta Irungo Udalak aurtengo balantzearen datu ofizialak ezagutzera eman ditu. Guztira, 342 bisitari hurbildu dira Aiako Harria naturagunearen bihotzean dagoen arreta-gunera, eta beste 72 pertsonak parte hartu dute ingurunea hobeto ezagutzeko antolatutako bost jarduera berezietan. Sergio Javier Garapen Jasangarriko ordezkariak instalazioa bisitatu du balantzea egiteko, eta azpimarratu du gunea “informazio-puntu bat baino askoz gehiago” dela, erreferentzia bilakatu baita ibilbideak egin edota inguruneko flora zein fauna ezagutu nahi dituztenentzat.
Estatistikoki, abuztua izan da hilabeterik jendetsuena Erlaitzeko zelaietan kokatutako zentroan, 129 bisitari jaso baititu (denboraldi osoko % 37,7). Bisitarien profilari erreparatuta, 40 eta 65 urte bitarteko herritarren taldea izan da nagusi (229 pertsona, % 67). Jatorriaren arabera, berriz, Irundik kanpoko baina Euskadiko bisitariak gailendu dira (159 pertsona, % 46,5). Zentroa guztira 50 egunez egon da zabalik aurten: Aste Santuan, eta ekainetik urrira bitarteko asteburu, zubi, jaiegun zein jai bezperetan, goizeko 09:30etik 13:30era.
Txango arrakastatsuak
Informazio arruntaz gain, naturaz familian gozatzeko doako txango gidatuek pisu handia izan dute arrakastan. Aurten bost irteera antolatu dira 72 parte-hartzailerekin, mineralak, polinizatzaileak edo bertako zuhaitzak bezalako gaiak jorratuz. Gainera, denboraldiak berrikuntza aipagarriak utzi ditu baliabide didaktikoetan: batetik, inguruko hegaztiak ezagutzeko fitxak banatu zaizkie bisitariei zein ekintzetako parte-hartzaileei; eta bestetik, bisitarien ohiko galderak argitzeko eta naturaguneko bidexketan errazago orientatzeko mapa espezifiko berriak sortu dira.
