Datorren azaroaren 23an, astelehena, 18:00etan, Lupe Calvo Elizazu kazetariak idatzitako “Por todas. Asun Casasola, activista contra la violencia sexual” liburua aurkeztuko dute Irungo Palmera Montero gunean. Catarata argitaletxeak kaleratutako lan honek Nagore Laffageren amaren bizitza eta azken urteetako borroka nekaezina biltzen ditu, bere alabari gertatutakoa beste inori berriro ez gertatzeko helburuarekin.
Aurkezpena Azaroaren 25eko Emakumeen Aurkako Indarkeria Ezabatzeko Nazioarteko Egunaren testuinguruan antolatutako jardueren barruan kokatzen da, eta Nevenka Fernándezen hitzaurrea dakar berarekin. Liburua salgai dago jada ohiko liburu-dendetan, eta Palmera Monteroko aurkezpen-ekitaldian bertan ere aleak erosteko aukera egongo da.
Liburuak 2008ko uztailaren 7an Iruñean gertatutako krimena eta 2009ko azaroko epaiketa berrikusten ditu. Epaia giza hilketa gisa ebatzi zen erailketa izan beharrean, eta prozesu judizialak agerian utzi zituen gizartean errotutako matxismoa zein biktimek jasandako birbiktimizazio gogorra. Gertatutakoaren ondoren, Casasola sexu-indarkeriaren aurkako erreferente bihurtu da gizarte-mugimenduan: urtero 70 eta 80 hitzaldi artean ematen ditu askotariko elkarte eta guneetan, bereziki 15 eta 18 urte bitarteko gazteekin Euskadi, Nafarroa eta Errioxako ikastetxeetan. Nevenka Fernándezek hitzaurrean azpimarratu bezala, Casasolak bere dolu lazgarria emakume guztientzako duintasun-ezkutu bihurtu du adostasuna eta «bakarrik baietz da baietz» printzipioa eztabaidaren erdigunean jartzeko bidean.
Biografia osatzeko, Calvok Asunen eta bere familiaren zuzeneko testigantzak jaso ditu, bai eta Irun zein Iruñeko mugimendu feministako ordezkarien ekarpenak ere. Kazetari gisa ibilbide luzea du egileak —Radio Euskadin, Euskadi Irratian, El País egunkarian eta SWI swissinfo.ch atarian aritua—, eta 2024an Lourdes Ibáñez de Gaunaren inguruko lana argitaratu zuen argitaletxe berarekin.
