Irunen Abisu, Kexa eta Iradokizunen (AKI) zerbitzuak sendotasun handia erakutsi du 2025eko balantzean, guztira 6.647 kontsulta erregistratuta. Datu honek zerbitzuaren historiako bigarren urterik onena bilakatu du iazkoa, 2024an lortutako inoizko marka gorenetik (6.947 kontsulta) soilik 300 bat eskaerara geratuz. Jon Ugarte Gobernu Irekiko eta Herritarren Arretako ordezkariak aurkeztutako datuek agerian uzten dute irundarrek konfiantza handia dutela 1997an sortu zen eta laster 30 urte beteko dituen tresna honetan.
Zerbitzuaren bilakaera historikoari begiratuta, AKI zerbitzua duela 25 urte baino gehiago jaio zen, Herritarrentzako Arreta Zerbitzua (HAZ) irekitzearekin batera. Lehen urteetako hazkunde azkarraren ondoren, 2006tik aurrera erabilera maila nahiko konstante mantendu da. 2025eko abenduaren 31ra arte, zerbitzuak guztira 117.271 erregistro pilatu ditu bere ibilbide osoan. Gainera, azterketa estatistikoak dioenez, abisu eta kexen banaketa oso homogeneoa eta orekatua da hiri osoan, auzo bakoitzeko biztanleriarekiko proportzioari zuzen erantzunez.
Gai nagusiei dagokienez, bideen garbiketa izan da berriz ere herritarren kezka nagusia 1.297 abisurekin, eta ondoren parkeak eta lorategiak kokatu dira 710 kexarekin. Zerrenda honetan jarraitzen dute TAOak, hiriko garraioak, hiri-hondakinek eta Udaltzaingoko ordenantzek. Kanpoko erakundeen kudeaketari dagokionez, Txingudiko Zerbitzuen Partzuergoak (Txinzer) jaso ditu kontsulta guztien %39, batez ere bideen garbiketaren eskumena berea delako.
Online bidearen gorakada
Herritarrek Udalarekin harremanetan jartzeko dituzten bitartekoetan joera aldaketa bat sumatu da. Telefonoa izan da oraindik ere erabiliena (3.459 kontsulta), baina aurreko urtean baino ia 700 gutxiago izan dira. Aldiz, online bideak gora egin du: webguneak 1.980tik 2.255 kontsultara egin du salto urtebetean, eta Irun App aplikazioak bere goranzko bideari eutsi dio: 2023an 425 izan ziren, 2024an 591, eta 2025ean 755 eskaerara iritsi da. Horrez gain, herritarrek HAZeko bulegoak, egoitza elektronikoa eta 010 telefonoa dituzte eskuragarri.
Azkenik, kudeaketa denborei buruzko datuak eman dira. 2025ean, erantzuteko batez besteko denbora 6,75 egunekoa izan da. Nahiz eta ahalegin handia egiten den abisuak arlo bakoitzeko erreferenteei bideratzeko denbora laburtzeko, azken bi urteetan batez besteko hori luzatzen joan da. Hau eskaera kopuruaren igoerari egozten zaio, gero eta bolumen handiagoa jasotzen baita eta horrek kudeaketa lan handiagoa eskatzen baitu herritarrei erantzun egokia emateko.
