Moskuko Jaiak bueltan dira 2026ko abuztuaren 13tik 16ra bitartean, adin eta gustu guztientzako egitarau zabal herrikoiarekin. Festak ostegunean, abuztuak 13, abiatuko dira plazan 19:00etan egingo den Biglak-en fanzine aurkezpenarekin eta 19:45ean zabalduko den Palestinaren inguruko erakusketarekin.
Ostiralean, abuztuak 14, jaiei hasiera ofiziala emango zaie 19:30ean pregoiarekin. Ondoren, 20:00etan DJ Lekuren musika saioa izango da, eta 22:00etatik aurrera gaueko kontzertuek hartuko dute lekukoa Perlata, Txintxes eta Stupid Fuckin People taldeen eskutik.
Larunbata, abuztuak 15, herri-ekimenez betetako eguna izango da: 12:30ean ardo dastaketa egingo da txosnan, eta 14:00etan herri-bazkaria ospatuko da Peña kalean. Bazkalostea alaitzeko Selektah Stepi eta lagunak arituko dira leku berean. Arratsaldean, 19:00etan, omenaldia egingo diote “Karlitos”-i, hainbat lagunek mikrofonoa hartuta. Gauean, 21:00etan hasita, musika emanaldi indartsuak egongo dira Niña Dioz, La Basu, Ezezez eta The Border Outlaws taldeekin.
Azkenik, igandean, abuztuak 16, egun osoko jarduerak antolatu dituzte. Goizean haur-jolasak (11:00etan plazan) eta Kemen dantza taldearen saioa (12:30ean) egongo dira. Bitartean, 13:00etan patata-tortilla txapelketa eta 15:00etan mus txapelketa jokatuko dira txosnan. Arratsaldean, 16:00etan artisau eta bigarren eskuko azoka irekiko da, 17:30ean bertso saioa egongo da plazan, eta 19:00etan sardin zaharren salmenta zein haur jolas autogestionatuak (toka, boloak…) egingo dira. Festak borobiltzeko, txosna itxi aurreko azken musika pintxada Selector Don Looperen eskutik izango da 21:00etan.
Gainera, abuztuaren 10etik 14ra Pala Txapelketa jokatzen ari da Uranzuko frontoi txikian 16:00etatik 22:00etara hiru mailetan: hastapenekoa, ertaina eta aurreratua.
