Irungo Udaleko Kirol arloak jakinarazi duenez, jada zabalik dago urrian, azaroan eta abenduan Artaleku eta Azken Portuko kiroldegietan eskainiko diren ikastaroetan izena emateko epea. Pandemia aurreko formatua berreskuratzea da berritasun nagusia, bertan behera utzi baitira COVID-19ari aurre egiteko abian jarri ziren mugak.
Guztira, 342 ikastaro programatu dira udazkenerako. Horietatik, 227 igeriketakoak dira, eta 115, aldiz, aretokoak. Instalazioaren arabera banatuta, 163 jarduera egingo dira Artalekun eta 179 Azken Portun. Orotora, 3.769 plaza eskainiko dira, 1.658 Artalekun eta 2.111 Azken Portun.
Ikastaroei eta ordutegiei buruzko informazio guztia kontsultatu daiteke www.irun.org/es/deportes webgunean. Interesdunek esteka hori bera erabil dezakete behin-behinean izena emateko. Bestela, behin-behinean izena emateko fitxa bete dezakete, eta Artaleku eta Azken Portuko harreran dauden kutxetan utzi. Izena emateko epea irailaren 6ra arte luzatuko da. Behin-behineko izen-ematearen fase hau harpidedunei eta harpidedun ez direnei zuzenduta dago.
Ondoren, izen-emateak berresteko fasea egingo da, irailaren 12tik aurrera. Ohiko metodoa erabili beharko dute harpidedun direnek nahiz ez direnek: aurrez aurre, aurretik hitzordua hartuta, edo internet bidez. Gogoan izan, izena emateko fase horretarako, prozedura online egiteko beharrezkoa dela BAKQ txartela eguneratua izatea.
Hitzorduan, izen-emate bakarra egin daiteke. Zerrenda bakoitzeko hitzorduak amaitzen direnean (guztira, lau zerrenda mota osatuko dira) aukera egongo da ikastaro gehiagotan izena emateko, betiere lekurik geratzen bada. Horrez gain, lau zerrendetako hitzordu guztiak amaitzen direnean, izen-emateak egin ahalko dira, online edo aurrez aurre instalazioetako harreran. Hitzorduen epea amaitzen denean, izen-emate librearen txanda bat irekiko da behin-behineko izen-ematerik egin ez dutenentzat.
Behin-behineko izen-ematea egin dutenen hitzorduen orduak irailaren 7an zozkatuko dira, 12:00etan. Jarraian, zerrenda horiek jendaurrean jarriko dira, eta irailaren 12an izen-ematea formalizatzeko epea hasiko da. Artaleku eta Azken Portuko igeriketa-proba irailaren 3an egingo da, 10:00etatik 13:00etara, Artalekun.
