Bidasoaldeko eskualdeak emaitza oso positiboak lortu ditu 2026ko Aste Santuan eta Pazko Astean, bere posizioa kultura-turismoaren erreferente gisa berretsiz. Egun hauetan, Irun eta Hondarribiko turismo-eskaintza sendoak bisitari ugari erakarri ditu, eta horrek eragin zuzena izan du informazio guneetan eta ostatuetan. Hazkunde horren adibiderik argiena Irungo Turismo Bulegoan ikusi da, non kontsultak iazkoarekin alderatuta bikoiztu egin diren, 58 bisitaritik 115era igaroz.
Oiasso Museoak ere datu garrantzitsuak utzi ditu, guztira 575 pertsona bertaratu baitira jai egun hauetan. Kopuru hori azken zortzi urteetako batez bestekoa baino % 3 handiagoa da. Arrakasta horren zati handi bat duela urtebete inauguratutako terma erromatarren bultzadari eta aurtengo berrikuntza nagusiari zor zaio: Tren Txikitoaren estreinaldiari. Tren elektriko berri honek 167 erabiltzaile izan ditu Santa Elena ermitara egindako ibilbidean, eta laster Irugurutzetako meatze-ingurunera ere iritsiko dela aurreikusi da.
Eskualdeko hotelen okupazioari dagokionez, batez bestekoa % 84,89koa izan da. Udalerriz udalerri, Hondarribiak % 88,46ko okupazioa lortu du eta Irunek % 83,23koa, batez besteko egonaldia 2,21 egunekoa izan delarik. Zifra horiek, nahiz eta iazkoa baino zertxobait txikiagoa izan, eskualdea erreferentziazko helmuga turistiko gisa sendotu dela berresten dute, batez ere kulturaren eta ondarearen esparruan.
Bisitarien profilari dagokionez, Fnazionala izan da nagusi, baina Irunen profil dibertsifikatuagoa nabarmendu da, Euskadiko (% 39,13), estatuko (% 28,70) eta atzerriko (% 32,17) turisten arteko oreka handiagoarekin. Nazioarteko bisitarien artean frantziarrak eta AEBetakoak gailendu dira.
Helmuga Turistiko Adimenduna
Azkenik, Bidasoa bizirikek Helmuga Turistiko Adimendunaren (HTA) bereizgarria jaso du Basquetourren eskutik, eskualdeak jasangarritasunaren eta irisgarritasunaren alde egindako lana aitortuz. Nuria Alzaga presidenteak eta Estitxu Urtizberea presidenteordeak nabarmendu dutenez, aitortza honek eta lortutako datuek balioa ematen diote sektorearen eta erakundeen arteko lankidetzari, betiere kalitatea kantitatearen gainetik lehenesten duen eredu baten bidez. Gainera, eskualdeko hainbat enpresak, Oiasso Museoa eta Hotel Jauregi barne, Kode Etikoaren eta Enpresa Turistiko Adimendunaren zigiluak jaso dituzte.
