Ostiral honetatik igandera bitartean, Bidasoaldeko hainbat txokotan (Hondarribian, Irunen eta Pausu-Urruñan) Euskal Herriko Txotxongilolarien 3. Topaketa ospatuko da. Asteburu osoan zehar, adin guztietako publikoari zuzendutako ikuskizunak, hitzaldiak eta emanaldi bereziak izango dira, eskualdea txotxongiloen unibertso magikoaren erdigune bihurtuz.
Egitaraua ostiralean, urriak 2, abiatuko da Hondarribian. 17:30ean, Kultur Etxean, Gus Marionetas taldeak topaketaren inaugurazioa egingo du (3 urtetik gorakoentzat), eta 19:00etan “Polborina” gunean hitzaldi bat eskainiko da ‘Txotxongilo herrikoiari begiratuz’ izenburupean. Igandean ere Hondarribiko Kultur Etxeak hartuko du emanaldia, 12:30ean Nanoua Konpainiaren ‘Toumbalatoum’ ikuskizunarekin (18 hilabetetik gorako haurrentzat).
Larunbatean, hilak 3, ekintzak eskualde osora zabalduko dira. Goizean (10:00-13:00) ‘Hasian-Hasi’ saioa izango da Hondarribiko Olazabal parkean CIE Moukaren eskutik (+6 urte). Irunen bi hitzordu izango dira: 12:00etan Dunboako auzo-elkartean Trapusteros Teatrok ‘Mamulengo’ aurkeztuko du, eta 18:00etan Larreaundi auzo-elkartean Philipe Saumontek ‘Tout…l…Polichinelle’ eskainiko du (biak 5 urtetik gorakoentzat). Eguna borobiltzeko, 22:00etan, Pausu-Urruñako Xaia tabernak ‘Txotxongilolarien Kabareta‘ hartuko du, helduei zuzendutako emanaldi bereziarekin.
