Abenduaren 18an ospatzen da Migratzailearen Eguna. Hori dela eta, Josu Iguiñiz Irungo Udaleko Gizarte Ongizateko ordezkariak, Jose Luis Roncero Moviltik-eko arduradunarekin batera, egitarauaren xehetasunak aurkeztu ditu gaur goizean emandako prentsaurrekoan. Datorren astetik aurrera, hiriko ikasleek hainbat tailer egingo dituzte emigrazioaren inguruan sentsibilizatzeko.
‘Loturak elkargune’, errealitate birtualeko betaurrekoak erabilita, emigrazioaren inguruan sentsibilizatzeko programa bat da. Moviltik elkarteak diseinatutako tailerren bitartez egingo da, prozesu migratzaileen inguruan eta pertsona migratzaileen harreraren inguruan gazteria sentsibilizatzeko helburuarekin. Lan hau gure hirian txertatzeko asmoz, Gizarte Ongizateko arloak tailer hauek egingo ditu Irungo hainbat ikastetxetan.
Josu Iguiñiz ordezkariak azpimarratu duenez, “50eko eta 60ko hamarkadetan hiriaren garapena azkar hazi zen, hiriak izan zuen immigrazio handiagatik. Hiri honek beti hartu izan ditu besoak zabalik bere lurraldetik urrun bizi proiektu berri bat hasi nahi zuten pertsonak, lagunak eta familia”. Gaineratu duenez, “orain, Gizarte Ongizateko arlotik, beraz, funtsezkoa da kultura anitzeko ikuspegia gainditzea eta kulturartekotasuna estrategia gisa onartzea. Horrek esan nahi du praktika kulturaletan sakontzea eta pertsonen arteko elkarrekintza positiboa sustatzea, tratu- eta aukera-berdintasuna helburu”.
Errealitate birtualeko obrak hiru emakume gazte migratzaileren esperientziak kontatzen ditu. Tailerretan ezagutza, elkarrizketa eta hausnarketa sustatuko dira, eta gazteek gizarte inklusiboei eta askotarikoei buruz duten iritzia adierazteko aukera izango dute. Esperientzia murgiltzaileen eta narrazio digitalen konbinazioak gizarte-errealitate konplexuei buruzko ikaskuntza enpatikoa eta sakona errazten du.
Hirubide (azaroaren 20an), Eguzkitza (abenduaren 9an eta 10ean) eta Txingudi Ikastola (abenduaren 22an eta 23an) ikastetxeetako Derrigorrezko Bigarren Hezkuntzako 3. mailako eta Mendibil Heziketa Zentroko (abenduaren 3an eta 4an) 350 ikaslek parte hartuko dute tailer horietan. Udal ekimen honen bitartez azpimarratzen da teknologia murgiltzaileen eta narrazio digitalen bidez gizartea sentsibilizatzeko lotura esanguratsuak sortzeak duen garrantzia.
Tailerrak, programaren helburuei buruzko sarrera labur batekin hasiko dira, jarraian errealitate birtualeko betaurrekoekin emakume migratuen historiei buruzko ariketari ekiteko. Ondoren, ikasleekin egingo den solasaldiak migrazioaren egoerari buruzko hausnarketa eskainiko du.
Erakusketa Palmera Monteron
Hiriko ikasleekin egingo diren tailer horiekin batera, Palmera Monteron emakume migratzaileei buruzko erakusketa bat egongo da abenduaren 20tik 27ra. Aurrerago emango dira horri buruzko xehetasunak.
