UKKE siglen atzean hiriko sortzaile guztiak biltzeko sortu den elkartearen izena ezkutatzen da: Unibertso Kreatiboa Kultur Elkartea. 51 kide batu dira dagoeneko orain dela urtebete abiatutako egitasmo honetara. Gainera, lehen urteurrenera iritsi aurretik, beren helburu nagusia lortu dute jada: tokiko sortzaileak konektatzea eta sinergiak sortzea. Elkarteko kide diren Vicent Martí elkarteko lehendakariak, Itziar Sistiaga idazle eta ordezkariak eta Joseba Olaskoaga eta Bixen Vergara argazkilariek UKKEren martxan jartzea azaldu dute.
Nola piztu zen elkarte hau sortzeko ideia?
Itziar: Duela urte bat Vicent, Iñigo eta hirurok hizketan hasi ginen hainbat sortzaile ezagutu arren, ez genekielako zehazki zer egiten zuten; bakoitza bere proiektu pertsonaletan zentratuta baitago. Beraz, ingurukoak zertan dabiltzan jakin nahi genuen. Bestetik, gauzak egin eta sortu ahal izateko espazioetarako sarbidea falta zitzaigula ikusi genuen, norbanako gisa, elkarterik gabe, horiek erreserbatzea ezinezkoa baita. Beraz, gure artean elkartuz, espazioak eta aukerak zabaltzen zirela ikusi genuen. Joan den urteko urriko amaieran bi bilera egin genituen. Ezagutzen genituen sortzaileen artean deialdia zabaldu eta, gure sorpresarako, 100 bat pertsona inguru gerturatu ziren, diziplina guztietakoak eta hor konturatu ginen bazegoela interesa.
Elkarteari Unibertso Kreatiboa Kultur Elkartea, UKKE, izena jartzea erabaki duzue.
Vicent: Unibertso kreatiboa izena jartzearen ideia kulturaren hainbat alderdi bateratzen saiatu ginela islatzeko zen. Gure ustez, 60.000 biztanle dituen hiri honek, Irunek, alegia, kultur sare oso indartsua du, jende asko ari baita gauza asko egiten. Unibertso hori guztia batu nahi izan dugu elkartearen izenaren barnean.
“Gure artean sinergiak sortzea asko gustatzen zaigun zerbait da, elkar lagunduz gauza berriak egiteko”
Itziar Sistiaga, UKKEko ordezkaria eta idazlea
Hori baita proiektuaren aberastasun nagusia: diziplina desberdinetako sortzaileentzako elkargunea izatea.
Itziar: Gauza guztiz ezberdinak egin arren, erronkak berdinak dira. Bakoitzak bere proiektuarekin bide bat egiten duen arren, arazoak berdinak dira guztientzat: non egin, noren laguntzarekin edo nola hazi. Egunero aurkitzen ditugun arazoak dira gainera. Gure artean sinergiak sortzea asko gustatzen zaigun zerbait da, elkar lagunduz gauza berriak egiteko. Pozik gaude, soilik urte bat pasa den arren, emaitzak ikusten hasi garelako.
Hau da, hirian zegoen behar bati erantzuteko sortu da zuen elkartea, ezta?
Joseba: Lehenengo bileretan jada 100 pertsona elkartu zirenean, benetan behar hori zegoela baieztatu genuen. Bakoitza gure etxean gauzak egiten ari ginen eta, elkar ezagutu arren, ez ginen gauzak egiteko elkartzen. Beraz, elkarteak sinergia horiek sortzeko eta elkarlanean hasteko aukera eman zigun.
Elkarteak erakusten du Irun talentu handiko lekua dela, izan ere, zenbat kide zarete jada?
Bixen: Gaur egun 45 eta 50 kideren inguruan gabiltza. Barnean diziplina ezberdinetako jendea gaude: aktoreak, idazleak, argazkilariak, magoak, etab. Niri interesa sortu zidana elkartzeari esker norberaren lana hobeto egiteko edo ezagutarazteko aukera izan zen. Izan ere, elkartasun sentimendu horrek indarrak ematen dizkizu aurrera jarraitzeko.
Hori da. Batasunak indar handiagoa ematen dizue, ezta?
Itziar: Sortzaile bizitza oso bizitza bakartia da. Besteekin elkartzen zarenean ikusten duzu ez zaudela hain bakarrik eta badaudela beste bide batzuk. Gauzak laguntzarekin errazago egiten baitira.
Zein baldintza bete behar dituzte elkartera batu nahi diren kide berriek?
Vicent: nahikoa da gure unibertso kreatibora batzeko nahi hori izatea. Ni bezalako pertsonak ez gara artistak eta sormenaren unibertsoaren barruan gaude, baina egiten dakigunarekin laguntzeko prest gaude. Zerbaitetan lagun dezakeen oro ongi etorria da, betiere beste pertsona batzuei beren artea irakasten lagundu badiezaieke edo artea partekatzen lagundu badiezaieke. Horregatik, etorri eta gure familiarekin bat egin nahi izatea da egin beharreko gauza bakarra.
Itziar: Izena emateko, elkartearen webgunean sartu eta bertan zure datuak uztearekin nahikoa da. Urteko kuota nahiko sinbolikoa da, 50€ dira soilik. Beraz, nahikoa da hori egitea.
Eta elkartearen barnean berriz, nola antolatzen zarete?
Joseba: Hilabetean behin bilera egiten dugu, igande goizetan izaten da, ordutegi aldetik munduko “ordurik onenean”, alegia. Bertan hilabetean zehar egindakoak eta sortutako proposamen berriak errepasatzen dira. Hortik aurrera, antolatu beharrekoak prestatzen hasten gara. Esaterako, iaz liburu azoka bat antolatu zen Dunboan eta hori antolatzeko lantalde bat sortu zen.
Nolako ekitaldiak antolatu dituzue orain arte?
Itziar: Antton Anuncibayren marrazki erakusketa bat egin genuen eta 400 pertsona baino gehiago etorri ziren. Dunboan berriz, Liburu Azoka antolatu genuen. Horretaz gain, liburu aurkezpenak, hitzaldiak eta hainbat ekitaldi egin dira, Sagarfest adibidez. Hain zuzen ere, horregatik pozik gaude ematen ari garen pausuek emaitzak ematen dituztela ikusten dugulako. Gainera, pentsatu behar dugu ez garela gauza hauek egiten profesionalak eta asko gainera, elkarte baten parte garen lehen aldia da. Nahigabe gauza batzuetan hanka sartuko dugu, baina gure helburu nagusia kultura lehen lerroan jartzea da. Bidasoaldean magma kreatibo handia dago eta guk hor egon nahi dugu.
“Gure helburua beti izango da Irunen dagoen talentua eta 0 Kilometroko sormena sustatzea, horrelako asko dago eta”
Vicent Martí, UKKEko lehendakaria
Zeintzuk izango dira zuen hurrengo ekitaldiak?
Joseba: Ni adibidez, argazkilari bezala, erakusketa bat prestatzen ari naiz, baina elkartean prestaketak antolatzen ari gara oraindik. Oihana Recaldek ere Sagarfest ekitaldiaren edizio berri bat antolatzeko asmoa du.
Bixen: Liburu aurkezpenen bat egiteko ideia ere badago. Nik ere badaukat prestatuta beste argazki erakusketa bat eta nola egin dezakegun ikusi behar dugu.
Itziar: Oso polita da iaz gehienak ez ginelako gure artean ezagutzen. Urtebete geroago, elkarrekin planak egiten ditugu eta gure artean hainbat kolaborazio sortu dira. Orain behintzat badakigu zertan ari diren lanean gure ingurukoak. Gainera, elkarteko gainontzeko kideen babesa sentitzen dugu. Beraz, jada elkartearen helburu nagusia lortu dugula esan dezakegu: zerbait polita sortzea mundu honetan bakarrik ez gaudela sentitzeko.
Elkartearen izenak ondo islatzen du sormena zuen ezaugarri nagusietako bat dela. Zeintzuk dira buruan dituzuen hurrengo erronkak?
Vicent: Gauza handietan pentsa dezakegu. Egia esan, guk nahi duguna da antolatzen dugun guztiak tokiko talentua sustatzeko eta maila gorenera eramateko balio izatea. Irun Zuzenean jaialdiaren bidez, hemengo taldeak talde ospetsuagoen telonero edo aurreko talde izatea lortzen ari dira. Ildo horretan, honako hau litzateke hurrengoa: haiekin jo nahi duten beste talde batzuk egotea, edo gure aktoreekin edo argazkiekin elkarlanean aritzeko eskatzea, adibidez. Gure helburua beti izango da Irunen dagoen talentua eta 0 Kilometroko sormena sustatzea, horrelako asko dago eta.
Elkarrizketa osoaren bideoa Txingudi Onlinen ikusgai duzue.
