Irungo Udalak Real Unión klubari harrera ofiziala egin zion atzo arratsaldean, joan den igandean Naxara CD taldearen aurka jokatutako partidan 1. RFEF mailara igotzea lortu ostean. Udalerriko Areto Nagusian ospatu zen ekitaldian, Cristina Laborda alkatea buru duen udalbatzak taldeko plantilla, staff teknikoa eta zuzendaritza zoriondu zituen lortutako arrakastagatik.
Segizio unionista autobus ofizialean iritsi ziren Jenaro Etxeandia Plazara. Bertatik, udaletxera hurbildu ziren zinegotziekin batera, eta udal taldeetako bozeramaileek harrera egin zieten atarian. Ekitaldi instituzionala Areto Nagusian garatu zen, eta Igor Emery presidentearen zein Cristina Laborda alkatearen hitzaldiak izan ziren protagonista. Saioari amaiera emateko, familia-argazki bat atera zuten protagonistek, une historiko hau hilezkor bihurtzeko.
“Inork ez du ezer oparitzen”
Garaipen honekin, Real Uniónek urtebete eskasera berreskuratu du 1. RFEF mailako tokia. Laborda alkateak taldearen esfortzua eta irmotasuna goraipatu nahi izan ditu bere hitzaldian: “Gaur ospatzen ari garen emaitza ahalegin horren fruitua da. Futbolaren munduan sarri esaten den bezala, ‘inork ez du ezer oparitzen’, eta Real Uniónen hori inork baino hobeto dakizue. Ez dago saririk lanik gabe, eta badakigu bidea ez dela erraza izan. Merezi duzue, Real Uniónek merezi du eta Irunek merezi du”.
Historia handiko kluba
Gogoratu beharra dago Real Unión Kluba Espainiako Futbol Ligako Txapelketa Nazionala 1929an sortu zuten hamar klub fundatzaileetako bat dela. Talde txuri-beltzaren palmaresean lau Errege Kopa ageri dira (1913, 1918, 1924 eta 1927), eta historian zehar lau denboraldi egin ditu Lehen Mailan eta hamar Bigarren Mailan, Gipuzkoako futbolaren erreferente nagusietako bat izanik.
