Irungo Udaleko Kulturako zerbitzuak abian jarri du Ribera beken deialdi berria, eta interesdunek dagoeneko zabalik dute proiektuak aurkezteko epea datorren 2027ko otsailaren 1era arte. Dirulaguntza hauen helburu nagusia giza zientzietako ikerkuntza eta sorkuntza artistikoa uztartzea da, bereziki mugarekin, memoria historikoarekin eta Bidasoa ibaiarekin zein bere ingurunearekin lotutako ikerlanak garatzeko. Guztira, 11.250 euro gordineko bi beka banatuko dira hautatutako proposamenak gauzatu ahal izateko.
Deialdian parte hartzeko ezinbestekoa da gutxienez bi pertsonaz osatutako taldeak eratzea, eta talde horietan bi profil zehatz egon beharko dira gutxienez: arte-munduarekin lotutako bat eta giza zientzietako ikerlanetan diharduen beste bat. Epaimahai batek aztertuko ditu aurkeztutako lanak, eta oinarrietan finkatutako hainbat irizpide baloratuko ditu, hala nola proposamenaren kalitatea, taldekideen aurretiko ibilbide eta esperientzia bi esparruetan, edota proiektuan genero-ikuspegia eta intersekzionalitatea txertatzea.
Eskabidearekin batera, hautagaiek gehienez 20 orrialdeko memoria laburra edo aurreproiektua aurkeztu beharko dute (gaia, helburuak, metodologia, lan-egutegia eta baliabideak zehaztuta), aurretik egindako lanen memoriarekin, motibazio-gutunarekin eta taldekide bakoitzaren eginkizunen azalpenarekin batera; halaber, material bisuala (irudiak, bideoak edo marrazkiak) gehitzea ere kontuan hartuko da. Eskaerak bi bideetatik izapidetu daitezke: online, Irungo Udalaren egoitza elektronikoaren bitartez, edo aurrez aurre, San Martzial kaleko 2. zenbakian dagoen Herritarrentzako Arreta Zerbitzuan (HAZ). Oinarri osoak Udalaren webgunean daude eskuragarri.



