Irungo Udaleko Berdintasun Zerbitzuak Maskulinitateei buruzko Zinema-Zikloa antolatu du udazkeneko egitarauaren barruan, hirian lehen aldiz egingo den ekimena. Maite Cortina Berdintasuneko eta LGTBIQ+ Eskubideetako ordezkariak eta Patxi Pérez aktore irundarrak —zikloaren dinamizatzailea izango denak— aurkeztu dute proiektua. Emanaldiak urriko asteazkenetan egingo dira Amaia KZko hitzaldi-aretoan, arratsaldeko 18:30etik aurrera.
Ziklo berri honen helburu nagusia da gizonen eta emakumeen arteko benetako berdintasunean sakontzea, maskulinitate-eredu tradizionalak zalantzan jartzea eta zaintzan zein errespetuan oinarritutako balio berriak sustatzea. Sarrera doakoa izango da, baina aldez aurretik gonbidapena erreserbatu beharko da udal webgunean.
Egitarau anitza
Egitarauak aniztasuna, aitatasuna, adiskidetasuna, homosexualitatea eta arrazakeria bezalako gaiak jorratzen dituzten lau pelikula bilduko ditu. Lehen saioa urriaren 7an izango da ‘Ander’ (2009) filmarekin, homosexualitatea jorratu zuen lehen euskal pelikulaz gozatzeko eta ondorengo solasaldian Josean Bengoetxea aktore nagusiarekin hitz egiteko aukerarekin. Segidan, urriaren 14an ‘Close’ (2022) ikusi ahalko da, nerabezaroko adiskidetasunaz eta erruaz; urriaren 21ean ‘American History X’ (1998) proiektatuko da, neonazismoa eta birgizarteratzea hizpide hartuta; eta, amaitzeko, urriaren 28an ‘Ayer no termina nunca’ (2013) eskainiko da, bikote-harremanei nahiz barne-zauriei buruzko gogoeta egiteko.
