Osasun Bidasoak, Bidasoa eta Bortziriak eskualdeetako 40 erakunde biltzen dituen Osasun Bidasoa Herri Plataformak, jakinarazi nahi du kontsulta espezializatuetarako eta proba diagnostikoetarako itxaron-zerrendak gero eta luzeagoak direla. Atzerapen diagnostiko larriak dakartzaten itxaron-zerrenda luzeek, lehen mailako arretako eta beste espezialitate batzuetako profesionalen falta, eta arreta-gune egokirik eza, bai lehen mailako arretan, bai ospitalean, oraindik ebatzi gabe segitzen dute. Horregatik, plataformak 5 mobilizazio egingo ditu azaroan.
Itxaron-zerrenda amaigabeak eta atzerapen diagnostiko larriak
Gero eta zailtasun handiagoak daude arreta espezializatuko kontsultetara iristeko, eta itxaron- zerrenda amaigabeak daude proba diagnostikoak egiteko. Familia-medikuaren kontsultetatik ezin dira pazienteak normaltasunez bidali urologiako, errehabilitazioko edo minaren unitateko kontsultetara.
Traumatologia-kontsultara sartzeko itxaronaldia 186 egunekoa da (6 hilabete), 152 egunekoa (5 hilabete) otorrinorako, 230 egunekoa (8 hilabete) ekografia baterako eta 2 hilabetetik gorakoa gastroskopia, kolonoskopia edo TAC baterako (ikusi erantsitako taula). Horrek guztiak atzerapen diagnostiko larriak eta ekitate falta lotsagarria dakar; izan ere, erosteko ahalmen handia duten herritarrek kontsulta pribatuetara jo dezakete osasun publikoaren defizitak arintzeko, baina gainerako herritarrek, berriz, ezin dute. Egoera honek osasun-arreta jasotzeko desberdintasun larriak sortzen ditu herritarren artean. 2022ko martxotik, pandemia kontrolpean zegoenetik, itxaron-zerrendak 8 espezialitate eta 3 proba diagnostikotan handitu dira. Nabarmentzekoa da ekografiak 172 egunez luzatu direla, otorrinoak 138 egunez eta traumatologiak 57 egunez. Oftalmologiara sartzeko itxaron-zerrenda hobetu da, Donostiako klinika pribatu bati kataratetako 250 ebakuntza saltzearekin batera. Adibide bat, hezurretako eta artikulazioetako arazoetarako, familiako medikuak ezin ditu pazienteak minaren unitatera bidali, ezta errehabilitaziora ere. Gainera, ekografia bat eskatzen badio paziente bati traumatologiara bidaltzeko, ekografiako itxaron-zerrenda (8 hilabete) gehitu behar zaio traumatologiako itxaron- zerrendari (6 hilabete).
Hori guztia ezin zaio Pandemiari egotzi. Osasun Bidasoa Plataformatik uste dugu hornidura historiko eskasa dela, bai azpiegiturei dagokienez (ospitalea eta anbulatorioak), bai profesionalei dagokienez. Defizit kroniko horri baliabideen kudeaketa txarra gehitu behar zaio. Horrela, profesionalen kudeaketa txarra dela eta, zenbait profesional gure eskualdea utzi eta joaten ari dira Osakidetzako beste eskualdetara, beste autonomia erkidegoetara edo osasun pribatura lan-baldintza hobeak lortzeko
Herritarren parte-hartzea
Herritarrek eta erakundeek behin eta berriz egin dituzten mobilizazioak gorabehera, Osasun Bidasoak ez du egiaztatu osasun-administrazioak elkarrizketarako inolako borondaterik duenik arazo horiei epe labur eta ertainean irtenbideak bilatzeko. Behin eta berriz eskatu zaio elkarrizketa bat eskualdeko Osakidetzako gerenteari, baina ez du inoiz erantzun. Erantzun falta horrek Osakidetzaren araudia bera urratzen du, herritarrek eskubidea baitute “Euskadiko osasun-sistemaren jardueretan aktiboki, zuzenean edo ordezkatzen dituzten erakundeen bidez parte hartzeko”.
Horregatik guztiagatik, Irun, Hondarribia eta Bortzirietako biztanleel dei egiten diegu Bidasoan osasun-arreta publiko hobea lortzeko mobilizatzera. Gure eskualdeetako osasun arazoei berehalako konponbide sinesgarriak eskatzen ditugu.
Erreklamazioak
Osasun sailburuak profesionalekin, tokiko erakundeekin eta herritarren ordezkariekin elkarrizketatzeko konpromisoa betetzea eskatzen dugu. Herritarrei eta eragindako profesionalei entzuteak egoera hobetzea ahalbidetuko luke, errealitatea ezagututa.
Espezialistekin kontsultetarako eta proba osagarrietarako itxaron-zerrendak murriztea eskatzen dugu. Premiazkoak ez direnak 60 eguneko epea eta lehentasunezkoak 15 eguneko epea ez lukete inola ere gainditu behar.
Profesional gehiago baldintza duinetan kontratatzea eskatzen dugu, kontratu egonkorrekin, eta lanpostu hutsak eta absentziak betetzea, lan-karga onargarria izan dadin.
Kalitatezko arreta ahalbidetuko duen osasun-azpiegituretan inbertitzea eskatzen dugu. Ebakuntza-gelak ospitaleko eraikin erantsi batean, hirugarren anbulatorioa Oinaurren, eta Irun erdialdea eta Dunboa anbulatorioetako birmoldaketa.
Hurrengo mobilizazioak:
- Irungo Dunboako anbulatorioa. Azaroak 2, osteguna, 14:00etan.
- Irun Erdialdeko anbulatorioa. Azaroak 9, osteguna, 14:00etan.
- Hondarribiko anbulatorioa. Azaroak 16, osteguna, 14:00etan.
- Bidasoa Eskualdeko ospitalea. Azaroak 23, osteguna, 14:00etan.
- Irungo Zabalgune plaza. Abenduaren 2an, larunbata, 12:00etan.
