“Mi dulce Guerrero” elkarteak 1. motako diabetesaren sendabidea ikertzeko funtsak biltzeko helburuarekin antolatu du bere bosgarren Zunbaton Solidarioa. Ekimena datorren igandean, maiatzaren 17an, izango da Irungo Uranzu pilotalekuan. Goizeko 10:00etatik 13:00etara bitartean, kirola, musika eta elkartasuna uztartuko dituen jardunaldia aurreikusten da, adin guztietako herritarrei zuzenduta.
Jardunaldia goizeko 09:45ean hasiko da ateen irekierarekin eta maskotarekin egingo den Photo call-arekin. Zunbatonaren aurkezpen ofiziala 10:00etan egingo da, eta jarraian, hiru orduko zunba saioa hasiko da. Saioa gidatzeko hamar irakasle arituko dira: Mirian, Elena, Monika, Nahiara, Carolina, Bea, Juan, Luisa, Kriss eta Maria. Ekitaldiari amaiera emateko, 13:00etan talde argazkia aterako da eta 13:10ean oparien zozketa egingo da parte-hartzaileen artean.
Parte hartu nahi duten helduek sarrerak aldez aurretik eros ditzakete 10 euroan, Peluquería Jone (Ama Birjina Mirarietakoa kalea, 1) edo ZINNIA loradendan (Gipuzkoa Etorbidea, 32). Ekitaldiaren egunean bertan lehiatilan erosten badira, prezioa 13 eurokoa izango da. Haurren kasuan, 12 urtera artekoek 1,50 euroko sarrera solidarioa ordaindu beharko dute, eta hau ekitaldiaren egunean bertan eskuratu beharko da lehiatilan.
Antolatzaileek herritarrak animatu dituzte parte hartzera, pauso, dantza eta irribarre bakoitzak diabetesaren aurkako borrokan laguntzen duela azpimarratuz. Ekitaldiak hainbat babesle eta laguntzaileren babesa du, eta lortutako diru guztia ikerketara bideratuko da.
