‘Zubia Kirola‘ proiektua lehen urteurrena ospatzear dago. Bidasoa Atletiko Taldea da proiektuaren antolatzailea eta Irungo Udala berriz, laguntzaile gisa. Orain, beste urrats bat eman dute eta Larreaundiko Auzo Elkarteak bat egin du proiektuarekin Goyeneche Fundazioarekin batera. Entrenamenduez gain, proiektuak kirol-ekitaldietan parte hartzea aurreikusten du, BATek proba horietan lagunduta.
Gaur goizean San Juan plazan emandako prentsaurrekoan parte hartu dute Josu Iguiñiz Gizarte Ongizateko ordezkariak, Ibon Muñoz BATeko ordezkariak, Peio Epelde (Larreaundiko Auzo Elkartea), Iñaki Zamoranorekin (Laboral Kutxa, proiektua ekonomikoki babesten duena), Iune Polo eta David Martinez, Emaus Fundazioko ordezkariak, (Zubia Gizarteratze Zentroko kudeatzailea) eta Amaia Docampo, Goyeneche Fundazioko ordezkariekin batera, kirol proiektuan egin diren aurrerapenak aurkeztu dituzte gaur goizean. Prentsaurrekoan Salim Kharroubi eta Abdelkader Mallo ere izan dira, programako partaideak.
Programa 2024ko abenduan hasi zen eta astean bi entrenamendu egiten dira, bata goizez eta bestea arratsaldez, Susana Ruiz BATeko entrenatzailearekin. Saio horiek Zubia Gizarteratze Zentroaren erabiltzaileentzat dira, jarduera fisiko askotarikoa egin eta korrika egin nahi dutenentzat. Aurten 68 pertsonak parte hartu dute, horietako bi emakumeak, eta entrenamendu bakoitzean batez beste Zubia zentroko sei erabiltzailek hartu dute parte.
Orain, eta entrenamenduak auzoan egiten direnez eta zentroko erabiltzaileek Bidasoa Atletiko Taldeak antolatutako lasterketetan parte hartzen dutelarik, Larreaundiko Auzo Elkarteak bat egin du proiektuarekin Goyeneche Fundazioarekin batera, eta gizarteratzearen eta proiektuaren ikusgarritasunaren alde lan egin nahi duten hainbat pertsona gonbidatu ditu parte hartzera. Horrela, sorreran zeukan helburua, Irungo gizartean integratzeko kirola lotura gisa erabiltzea hain zuzen, indartu egiten da.
Josu Iguiñiz Ordezkariak adierazi duenez, “Zubia topagune, harrera eta atseden gune bat da, errealitate sozialari ahalik eta ondoen erantzuten diona. Zentro hori elementu garrantzitsua da gizartea hobetzeko, eta lanean jarraituko dugu sinergiak sortzen hiriko hainbat gizarte-eragileren artean, gaur aurkezten dugun hau bezala adibidez, gizarteratzean aurrerapausoak ematen jarraitzeko”.
Entrenamenduez gain, proiektuak kirol-ekitaldietan parte hartzea aurreikusten du, BATek proba horietan lagunduta. Horrekin batera, Bidasoa Atletiko Taldeak kanpaina bat sustatzen du bere masa sozialak erabiltzen ez dituen eta egoera onean dauden kirol-zapatilak eman ditzan, Zubian gera daitezen eta programan parte hartzen duten pertsonek eraman ditzaten.
‘Zubia Kirola’ 2023ko urrian hasi zen garatzen, Chakib Lachgarrek, Behobia-Donostia lasterketa herrikoia hiru aldiz irabazi zuenak, emandako hitzaldi baten ondoren. Ordutik aurrera, Zubiako kirol jarduerak partaide gehiago izaten hasi ziren ‘Kirolarekin zubiak eraikiz’ proiektuaren barruan, eta Bidasoa Atletiko Taldeak antolatutako lasterketetan parte hartze handiagoa izatean ‘Zubia Kirola’ sortu zen.
Zubia gizarteratze zentroa
Zubia Irungo Udalaren baliabide bat da, 2018tik martxan dagoena, eta Gizarte Ongizate Arloko Esku-hartze Komunitarioko Zerbitzuari dagokio. Gaur egun Emaus Fundazioak kudeatzen du.
