Minbizia munduko arazo soziosanitario garrantzitsuena da: 2 gizonetik 1ek eta 3 emakumetik 1ek minbizia izango dute bizitzan zehar. Minbizi kasu bat diagnostikatzen da 2 minutuan behin, eta 2030erako 330.000 kasu berri baino gehiago egongo direla kalkulatzen da.
Gaur egun, ikerketari esker, biziraupen-tasa %55,3koa da gizonezkoetan eta %61,7koa emakumezkoetan. Helburua 2030. urtean %70 gainditzea da, “Guztiok Minbiziaren Aurka” elkartuta.
Horretarako, ekainaren 10ean, Minbiziaren Aurka Gipuzkoan Iruneko kaleetara irtengo da elkarteko pertsona boluntarioekin batera gizarte osoaren lankidetza eskatzeko, minbiziaren ikerketa eta gaixotasunaren biziraupenaren %70a bultzatzeko.
Ekimena goizez izango da herriko 6 puntutan: Colón pasealekuan (Aguirre gozo-dendaren alboan), Zabaltza plazan, Femin Calbetónen, Urdanibia plazan, Hondarribia kalean eta Palmera Montero Gunearen alboan. Minbiziaren Aurka Gipuzkoan-etik eskerrak eman nahi dizkiegu boluntario guztiei, elkarteari ekitaldi hau eta beste hainbat prestatzen lagunduz egiten duten lanagatik.
Ikerketaren beharra
Gaur egun, 5 urterako gizonen biziraupena % 55,3koa da, eta emakumeena % 61,7koa. Ikerketari esker, azken urteotan, biziraupen-indizeak 3,3 puntu igo dira gizonetan, eta 2,6 emakumeetan 2016. urteaz geroztik intzidentzia %7,2 hazi den ingurune batean. Datu horien gorabehera, Elkarteak aurrera egiten jarraitu nahi du, eta %70eko biziraupena lortzera iritsi nahi du 2030ean. Hau da, minbizia duten hamar pertsonatik zazpik bizirik irautea. Gakoetako bat ikerketa-emaitzetarako sarbidean dauden ekitate ezak zuzentzea da, eta, horretarako, beharrezkoa da minbizi guztiak ikertzea, biziraupena handitzen jarraitzeko.
Hurrengo erronka
Minbizian %70eko biziraupena gainditu ahal izateko, ikerketa onkologikoa bultzatzen jarraitu behar da, eta pazienteek bermatuta izan behar dute ikerketaren emaitzak lortzeko aukera, guztiek medikuntza eta tratamendu berritzaileagoak eskura ditzaten. Batez ere, biziraupen txikia edo gelditua duten minbizi-motak (hau da, 5 urteko biziraupen-tasa %30etik beherakoa dutenak).
Minbiziaren Aurka Gipuzkoan, ikerketa onkologikoko hainbat proiekturi ematen dio laguntza. 2022ean 374.651€ bideratu zituen minbiziaren ikerketan aurrera egiten jarraitzeko, pazientearengan arreta jarriz eta minbiziaren biziraupena handitzen jarraitzeko.
Bidasoan elkarteak 1.712 bazkide eta 179 boluntario ditu. Doako zerbitzu guztiak (terapia psiko-soziala, prebentzio-jarduerak, material ortopedikoaren maileguak…), elkarteak jasotzen dituen dohaintzei esker eskaini ahal dira. Beraz, diru-bilketan parte hartzeak aukera emango dio Minbiziaren Aurka Gipuzkoan elkarteari paziente onkologikoei eta haien senideei laguntzen jarraitzeko.
